पर्सा प्रहरीले विशेष सूचनाका आधारमा सञ्चालन गरेको कारबाहीमा ३ हजार ५ सय लिटर तयारी घरेलु मदिरासहित चार जनालाई पक्राउ गरेको छ । घटनामा प्रयोग गरिएको सवारी साधन पनि प्रहरीले नियन्त्रणमा लिएको छ ।
जिल्ला प्रहरी कार्यालय पर्साका अनुसार शुक्रबार दिउँसो करिब १ः४५ बजे वीरगंज महानगरपालिका–१५ प्रतिमा चोकस्थित सडकखण्डमा हेटौंडाबाट वीरगंजतर्फ आउँदै गरेको बा.प्र.०३–००१ ज १४०२ नम्बरको सवारी साधनमा खानतलासी गर्दा प्लास्टिकका बोराभित्र लुकाएर राखिएको १०८ पोकामा करिब २ हजार २ सय लिटर तयारी घरेलु मदिरा बरामद गरिएको हो ।
यस क्रममा मकवानपुरको हेटौंडा उपमहानगरपालिका–१० निवासी २९ वर्षीय मनोजकुमार थिङ, बाराको जितपुर–सिमरा उपमहानगरपालिका–१ निवासी ३५ वर्षीया कोपिला गुरुङ, ३६ वर्षीया रोनु तामाङ र ३३ वर्षीया माया पाख्रिनलाई पक्राउ गरिएको प्रहरीले जनाएको छ ।
त्यसैगरी, सोही अपरेशनका क्रममा शुक्रबार अपराह्न करिब ४ बजे वीरगंज महानगरपालिका–१५ त्रिशूल चोकस्थित एक स्थानमा गैरकानुनी रूपमा भण्डारण गरी राखिएको थप ७५ पोकामा करिब १ हजार ३ सय लिटर तयारी घरेलु मदिरा बरामद गरिएको प्रहरीले जनाएको छ ।
बरामद गरिएको कुल ३ हजार ५ सय लिटर घरेलु मदिरा, सवारी साधन तथा पक्राउ परेका चारै जनालाई आवश्यक अनुसन्धान तथा कानुनी कारबाहीका लागि आन्तरिक राजस्व कार्यालय घडिअर्वामा बुझाउने प्रक्रिया अघि बढाइएको जिल्ला प्रहरी कार्यालय पर्साले जनाएको छ ।
.jpg)
.jpg)
.jpg)
.jpg)