सरकारी स्वामित्वको खाद्य व्यवस्था तथा व्यापार कम्पनी लिमिटेडको राजापुर शाखाले ढिलो गरी धान खरिद सुरु गरेको छ ।
कम्पनीले शुक्रबारदेखि धान खरिद प्रक्रिया अघि बढाएको हो । तर, धान खरिदमा भएको ढिलाइका कारण अधिकांश किसानले निजी व्यापारीलाई सरकारले तोकेको समर्थन मूल्यभन्दा निकै कम मूल्यमा धान बेचिसकेका छन् ।
सरकारले चालु आर्थिक वर्षका लागि मोटो धानको समर्थन मूल्य प्रतिक्विन्टल ३ हजार ६ सय ६० रुपैयाँ र मध्यम धानको ३ हजार ८ सय ६० रुपैयाँ निर्धारण गरेको छ । तर, सरकारी खरिद प्रक्रिया ढिलो हुँदा किसानले मोटो धान प्रतिक्विन्टल २ हजार ८ सय र मध्यम धान ३ हजार २ सय रुपैयाँमा निजी व्यापारीलाई बिक्री गर्न बाध्य भएका छन् ।
धान खरिदका लागि खाद्य व्यवस्था तथा व्यापार कम्पनीले बिहीबार राजापुर क्षेत्रका ४ सय किसानलाई कुपन वितरण गरेको थियो । कुपन प्राप्त गरेका किसानको धान खरिद सुरु गरिएको कम्पनीको मुख्य शाखा कार्यालय राजापुरका प्रमुख कमलराज पाण्डेले जानकारी दिनुभयो ।
उहाँका अनुसार राजापुर र बारबर्दिया नगरपालिकामा धान खरिद सुरु भइसकेको छ भने गोदाम व्यवस्थापन भएका अन्य पालिकामा पनि खरिद प्रक्रिया अघि बढाउने तयारी छ । कम्पनीले प्रत्येक किसानबाट अधिकतम २० क्विन्टलका दरले धान खरिद गर्ने जनाएको छ ।
चालु आर्थिक वर्षमा राजापुर शाखाले ३० हजार क्विन्टल धान खरिद गर्ने लक्ष्य राखेको छ । जसअनुसार २५ हजार क्विन्टल मोटो र ५ हजार क्विन्टल मध्यम धान खरिद गरिनेछ । जिल्लाका आठवटै पालिकाबाट ३/३ हजार क्विन्टलका दरले र बाँकी धान राजापुरस्थित मुख्य शाखाबाट खरिद गरिने जनाइएको छ ।
एकीकृत कृषि तथा पशुपन्छी विकास कार्यालयका अनुसार बर्दियामा ५० हजार १ सय ५० हेक्टर क्षेत्रफलमा धान खेती हुँदै आएको छ । गत आर्थिक वर्षमा जिल्लामा २ लाख २५ हजार ६ सय ७५ मेट्रिक टन धान उत्पादन भएको थियो । चालु वर्षको उत्पादन विवरण भने प्राप्त भइनसकेको कार्यालय प्रमुख कमला अधिकारीले बताउनुभयो ।
गत आर्थिक वर्षमा पनि खाद्य व्यवस्था तथा व्यापार कम्पनीले ३० हजार क्विन्टल मात्रै धान खरिद गरेको थियो । जिल्लामा धान उत्पादनको परिमाण ठूलो भए पनि सरकारी खरिद कोटा सीमित हुँदा अधिकांश किसान निजी व्यापारीमा निर्भर हुनुपर्ने अवस्था छ ।
किसानहरूले उत्पादनका आधारमा सरकारी खरिदको कोटा बढाउन र धान पाक्ने समयमै खरिद प्रक्रिया सुरु गर्न माग गरेका छन् ।