विज्ञान, प्रविधि तथा नवप्रवर्तनमन्त्री महावीर पुनले नेपालको समृद्धिका लागि सरकारले अनुसन्धान, नवप्रवर्तन र आविष्कारलाई प्राथमिकता दिएको बताएका छन् ।
धवलागिरि गाउँपालिका समाजले शनिबार काठमाडौंमा आयोजना गरेको ‘समृद्ध म्याग्दीमा जनप्रतिनिधिहरूको भूमिका’ विषयक अन्तरक्रिया कार्यक्रममा मन्त्री पुनले नेपालमा आवश्यक औजार, उपकरण, सामग्री र वस्तुको उत्पादन गरी रोजगारी सिर्जना तथा आयात घटाउन अनुसन्धानमा जोड दिइएको बताए ।
“ओझेलमा परेको अनुसन्धान र आविष्कारको क्षेत्रमा वर्तमान सरकारले प्राथमिकता दिएको छ,” मन्त्री पुनले भने, “देशका लागि आवश्यक जनशक्ति उत्पादन गर्ने र दक्ष जनशक्तिलाई अवसरका लागि पलायन हुन नदिने गरी मन्त्रालयले कार्यक्रम बनाएको छ ।”
कार्यक्रममा मन्त्री पुनसँगै धवलागिरि, मालिका र अन्नपूर्ण गाउँपालिकाका जनप्रतिनिधि तथा काठमाडौंमा बसोबास गर्ने म्याग्दीवासीबीच म्याग्दीको समृद्धिका सम्भावना र आवश्यकताबारे छलफल भएको थियो ।
मन्त्री पुनले कृषिको आधुनिकीकरण, जलविद्युत्, पर्यटन र पशुपालनका माध्यमबाट म्याग्दीलाई समृद्ध बनाउन सकिने बताए । उनले म्याग्दीको प्रमुख सामाजिक समस्याका रूपमा रहेको मेलाजात्रालाई व्यवस्थित गर्नुपर्नेमा जोड दिए । लगातार आयोजना हुने मेलाजात्राका कारण किशोरकिशोरीको अध्ययनमा असर परेको भन्दै उनले यसलाई व्यवस्थित नगरेसम्म शिक्षा क्षेत्रमा सुधार गर्न कठिन हुने बताए ।
“टोलटोलमा लगातार मेलाजात्रा लगाउँदा किशोरकिशोरीहरूको पढाइ नराम्ररी बिग्रेको छ,” उनले भने, “विदेशबाट लाखौँ रकम प्रायोजन गराएर हप्तौँसम्म मेला लगाउने चलन हटाउन सके म्याग्दीको शिक्षा र समाज सुधारमा सहयोग पुग्छ ।”
मन्त्री पुनले संघीय सरकारले यस वर्ष धवलागिरि गाउँपालिकाको मुदीदेखि गुर्जा हुँदै ढोरपाटनको जलजला र अन्नपूर्ण गाउँपालिकाको दोवादेखि सोवाङ धुरी हुँदै रघुगंगा गाउँपालिकाको चिमखोला जोड्ने दुई नयाँ पदमार्ग सञ्चालनमा ल्याउने जानकारी दिए । त्यस्तै, बेनी–दरवाङ सडकको फापरखेत र बेनी–जोमसोम सडकको सिरुवारी पहिरो नियन्त्रणको काम वर्षा सकिएपछि सुरु हुने उनले बताए ।
पाकिस्तानको ब्रड पिक आरोहणका क्रममा निधन भएका म्याग्दीमा जन्मिएका पर्वतारोही निर्मल पुर्जासहितका आरोहीहरूको सम्मानमा सरकारले उचित निर्णय लिने पनि मन्त्री पुनले बताए ।
कार्यक्रममा धवलागिरि गाउँपालिकाका अध्यक्ष प्रेमप्रसाद पुन, उपाध्यक्ष रेशम पुनमगर, मालिकाका अध्यक्ष बेगप्रसाद गर्बुजा र अन्नपूर्ण गाउँपालिकाका अध्यक्ष भारतकुमार पुनलगायतले म्याग्दीको सम्भावना र आवश्यक कामबारे मन्त्री पुनको ध्यानाकर्षण गराएका थिए ।
