नेपाली कांग्रेसका सभापति गगन थापाले सरकारका मन्त्रीहरूमा ‘छोटे राजा’ शैली देखिन थालेको आरोप लगाएका छन् । कांग्रेस केन्द्रीय कार्यसमिति बैठकमा बोल्दै सभापति थापाले मन्त्रीहरूबाट आउने अभिव्यक्ति र व्यवहारले यस्तो संकेत गरेको बताएका हुन् ।
पार्टी कार्यालयमा आइतबार सुरु भएको केन्द्रीय कार्यसमिति बैठकमा उनले सरकारका मन्त्रीहरूबाट हरेक दिनजसो ‘खुट्टा भाँचिदिन्छु, थुन्दिन्छु’ जस्ता भाषा प्रयोग हुन थालेको भन्दै यसलाई सत्ताको दम्भ र ‘छोटे राजा’ प्रवृत्तिको रूपमा व्याख्या गरे । उनले यस्तो शैलीलाई सच्याउन सरकारलाई खबरदारी गर्नु कांग्रेसको जिम्मेवारी भएको बताए । “यो सरकारलाई ठीक ठाउँमा ल्याउने जिम्मेवारी हाम्रो हो । किनकि संसद्मा प्रमुख प्रतिपक्षको भूमिकामा कांग्रेस छ,” उनले भने ।
सभापति थापाले भदौ २३ र २४ गते भएको घटनालाई आकस्मिक रूपमा मात्रै बुझ्न नहुने बताए । उनले उक्त घटनाअघि २०८१, २०८० र २०७९ सालका राजनीतिक घटनाक्रमलाई पनि समीक्षा गर्नुपर्ने धारणा राखे । उनले कांग्रेसको गति र मतिमाथि पटक–पटक प्रश्न उठेको उल्लेख गर्दै २१ फागुन २०८२ को प्रतिनिधिसभा निर्वाचनमा मतदाताले असन्तुष्टि व्यक्त गर्दै कांग्रेसलाई प्रतिपक्षमा पुर्याएको बताए ।
“हाम्रो गति र मति ठीक नभएकै कारण रिसाएका मतदाताले ब्यालेटमार्फत हामीलाई प्रतिपक्षमा पुर्याए,” उनले भने । उनले पार्टीका वरिष्ठ नेता अर्जुननरसिंह केसीले विगतमा नै नेपालमा बंगलादेशजस्तो अवस्था आउन सक्ने चेतावनी दिएको स्मरण गर्दै कांग्रेसले अझै आत्मसमीक्षा गर्नुपर्ने बताए ।
सभापति थापाले राष्ट्रिय स्वतन्त्र पार्टी (रास्वपा) ले निर्वाचनमार्फत ल्याएको परिवर्तनलाई सम्मान गर्ने बताए । तर जनताले खोजेको परिवर्तनको अनुभूति दिलाउन सरकार असफल भएको उनको आरोप थियो । सरकार गठन भएको १०० दिनलाई कांग्रेसले ‘हनिमुन पिरियड’का रूपमा हेरेको उल्लेख गर्दै उनले आवश्यक सहयोग गरेको बताए । प्रधानमन्त्रीले सरकारलाई ‘एक्सप्रेस गाडी’को संज्ञा दिएको प्रसंग उल्लेख गर्दै उनले भने, “एक्सप्रेस गाडीमा ब्रेक राख्ने नराख्ने उहाँहरूको कुरा हो, तर एक्सप्रेस वेमा लेन मिच्न पाइँदैन । हामी दिँदैनौँ ।”
थापाले बीपी कोइरालाको भनाइ उद्धृत गर्दै राष्ट्रिय संकटका बेला कांग्रेस चुप लागेर बस्न नहुने बताए । पार्टीभित्र मात्र नभई राष्ट्रिय संकट समाधानका लागि पार्टी बाहिर पनि कांग्रेसले भूमिका खेल्नुपर्ने उनको भनाइ थियो । उनले प्रतिपक्षमा रहनु संवैधानिक जिम्मेवारी भएको भन्दै सरकारलाई जिम्मेवार बनाउने, प्रश्न गर्ने र खबरदारी गर्ने भूमिका कांग्रेसको रहेको बताए ।
सभापति थापाले सरकारमाथि शासनमा अराजकता देखिन थालेको आरोपसमेत लगाए । संवैधानिक निकायका पदाधिकारीलाई प्रधानमन्त्री कार्यालयमा बोलाएर दबाब दिने, प्रधानन्यायाधीशमाथि प्रभाव पार्ने प्रयास गर्नु गलत भएको उनको भनाइ थियो ।
उनले २०४६ सालपछि सत्तामा रहेका सबै नेताको सम्पत्ति छानबिन गर्ने भनिरहेको सरकारले आफ्नै मन्त्रीहरूको सम्पत्ति छानबिन गरी प्रतिवेदन सार्वजनिक गर्नुपर्ने माग गरे ।
