जीतपुरसिमरा उपमहानगरपालिकाले सामुदायिक विद्यालयको शैक्षिक गुणस्तर सुधार तथा विद्यार्थीको सिकाइ उपलब्धि वृद्धि गर्ने उद्देश्यले ‘उज्यालो परियोजना’ सञ्चालन गर्ने भएको छ ।
सूर्य नेपाल प्रालिको संस्थागत सामाजिक उत्तरदायित्व (सीएसआर) कार्यक्रमअन्तर्गत करिब ६५ लाख रुपैयाँको लागतमा उपमहानगरपालिकाका ८ वटा सामुदायिक आधारभूत विद्यालयमा परियोजना कार्यान्वयन गर्न लागिएको हो ।
‘जिरो एजुकेशन पोभर्टी’ अर्थात् शून्य शैक्षिक गरिबीको अवधारणामा आधारित परियोजना सञ्चालनका लागि युनाइटेड वल्र्ड स्कुल्स नेपाल, जीतपुरसिमरा उपमहानगरपालिका र सम्बन्धित विद्यालयबीच त्रिपक्षीय सम्झौता भएको छ ।
सम्झौताअनुसार वडा नं. १० का श्री ने.रा. आधारभूत विद्यालय नितनपुर र श्री ने.रा. आधारभूत विद्यालय बेहेरा बलुवा, वडा नं. २० का बिक्रम आधारभूत विद्यालय बसतपुर र दुलारीमाई आधारभूत विद्यालय बस्डिलवा, वडा नं. ११ का श्री ने.रा. आधारभूत विद्यालय अमाडार र श्री ने.रा. आधारभूत विद्यालय खैरवा, वडा नं. ८ को श्री ने.रा. आधारभूत विद्यालय लोसन्डा तथा वडा नं. ६ को श्री ने.रा. आधारभूत विद्यालय नगौलमा परियोजना सञ्चालन हुनेछ ।
सम्झौतापत्रमा युनाइटेड वल्र्ड स्कुल्स नेपालका प्रतिनिधि अशोक घिमिरे, जीतपुरसिमरा उपमहानगरपालिकाका नगरप्रमुख राजन पौडेल तथा सम्बन्धित विद्यालयका प्रधानाध्यापक र व्यवस्थापन समिति अध्यक्षहरूले हस्ताक्षर गरेका छन् । नगरप्रमुख पौडेलका अनुसार उपमहानगरपालिकाले गरेको अध्ययनमा संस्थागत विद्यालयमा मध्यम तथा उच्च वर्गका बालबालिका अध्ययन गर्ने र सामुदायिक विद्यालयमा दलित, विपन्न तथा मुस्लिम समुदायका विद्यार्थीको संख्या बढी रहेको पाइएको छ ।
अध्ययनले सामुदायिक विद्यालयका विद्यार्थीको सिकाइ स्तर कमजोर रहेको देखाएको भन्दै उनले कक्षा ३ मा हासिल गर्नुपर्ने आधारभूत ज्ञानसमेत कतिपय विद्यार्थीले कक्षा ८ सम्म पुग्दा पनि प्राप्त गर्न नसकेको अवस्था सुधार गर्न परियोजना प्रभावकारी हुने विश्वास व्यक्त गरे । एक वर्ष सञ्चालन हुने परियोजनाअन्तर्गत विद्यालयको भौतिक तथा शैक्षिक वातावरण सुधार, शिक्षक तथा प्रधानाध्यापकको क्षमता विकास, आधुनिक शिक्षण सामग्रीको प्रयोग, विद्यार्थी र शिक्षकको नियमित उपस्थिति सुनिश्चित गर्ने कार्य गरिनेछ ।
त्यस्तै, आमा समूह, छात्रा समूह र विद्यालय अवधारणा टोलीमार्फत अभिभावक तथा समुदायको सहभागिता बढाइनेछ । परियोजनाले बाल संरक्षणलाई समेत प्राथमिकतामा राख्दै विद्यालयमा हुने हिंसा तथा दुव्र्यवहारविरुद्ध शून्य सहनशीलताको नीति अवलम्बन गर्ने जनाएको छ ।
