नेपाल प्रिमियर लिग (एनपीएल) को तेस्रो संस्करणको फाइनल खेलको टिकट बिक्री सुरु नहुँदै टिकटिङ प्लेटफर्ममा ‘सोल्ड आउट’ देखिएपछि दर्शकले असन्तुष्टि जनाएका छन् ।
शुक्रबार दिउँसो १ बजे फाइनल खेलको टिकट बिक्री खुल्ने भनिएको थियो । तर, बिक्री सुरु हुनुअघि नै टिकटिङ प्लेटफर्ममा ‘सोल्ड आउट’ देखिएपछि टिकट व्यवस्थापनमाथि प्रश्न उठेको छ ।
दिउँसो १२ बजेर ५७ मिनेटमा टिकटिङ प्लेटफर्म हेर्दा नै फाइनल खेलको टिकट ‘सोल्ड आउट’ देखिएको थियो । केही प्रयोगकर्ताको स्क्रिनमा भने टिकट बिक्री दिउँसो १ बजे खुल्ने समय देखिएको थियो । तर, निर्धारित समय भएपछि टिकट खरिद गर्न प्रयास गर्दा पनि सफल नभएको उनीहरूले बताएका छन् ।
धेरै प्रयोगकर्ताले दिउँसो १ बजेर १ मिनेटमा टिकट काट्ने प्रयास गर्दा पनि टिकट खरिद गर्न नसकेको गुनासो गरेका छन् । बिक्री सुरु नहुँदै ‘सोल्ड आउट’ देखिनु र बिक्री खुल्ने समय देखिएका प्रयोगकर्ताले समेत टिकट किन्न नसक्नुले सामाजिक सञ्जालमा असन्तुष्टि बढाएको छ ।
यसअघि पनि एनपीएलका खेलको टिकट बिक्री खुल्ने समयमा प्राविधिक समस्या देखिने र केही समयमै टिकट ‘सोल्ड आउट’ हुने गरेको भन्दै दर्शकले गुनासो गर्दै आएका थिए ।
फाइनल खेलको टिकट बिक्रीमा समेत उस्तै समस्या देखिएपछि टिकट व्यवस्थापनको पारदर्शिता र प्रभावकारितामाथि प्रश्न उठेको छ ।