श्रम संस्कृति पार्टीका अध्यक्ष हर्क साम्पाङले सरकारले जनताको वास्तविक समस्या र पीडा महसुस गर्न नसकेको आरोप लगाएका छन् ।
मंगलबार बसेको प्रतिनिधिसभा बैठकमा बोल्दै अध्यक्ष साम्पाङले जनताले देशमा सुरक्षा, न्याय र आवश्यक सेवा–सुविधा सहज रूपमा पाउन नसकेको बताए ।
उनले ग्यासका लागि समेत नागरिकले घण्टौँ घाममा लाइन बस्नुपर्ने अवस्था रहेको भन्दै सरकारले जनताको दुःख बुझ्न नसकेको आरोप लगाए । ठूलो आशा र विश्वासका साथ जनताले मत दिए पनि सरकारले अपेक्षित परिवर्तन ल्याउन नसकेको उनको भनाइ थियो । उनले सरकारका मन्त्रीहरूबीच नै समन्वय र विश्वासको कमी देखिएको टिप्पणी गरे ।
अध्यक्ष साम्पाङले देशभित्र अवसरको अभावका कारण युवाहरू विदेशिन बाध्य भएको उल्लेख गर्दै वैदेशिक रोजगारीका नाममा हुने ठगी नियन्त्रण गर्न र दोषीमाथि कारबाही गर्न सरकार असफल भएको बताए ।
उनले विगत साढे दुई महिनादेखि संसदमा प्रधानमन्त्रीको उपस्थितिको माग हुँदै आए पनि प्रधानमन्त्री उपस्थित नभएको भन्दै आलोचना गरे । प्रधानमन्त्रीको अनुपस्थितिलाई उनले “बालहठ र पदको गैरजिम्मेवारी” को संज्ञा दिए ।
