राष्ट्रिय स्वतन्त्र पार्टी (रास्वपा) की सचेतक क्रान्तिशिखा धितालले इन्टर्न डाक्टरलाई सरकारी र निजी मेडिकल कलेजका आधारमा विभेद गर्न नहुने बताएकी छन् ।
मंगलबार बसेको प्रतिनिधिसभा बैठकमा बोल्दै उनले मुलुकबाट चिकित्सक पलायन भइरहेको अवस्थामा डाक्टरलाई स्वदेशमै टिक्न सक्ने वातावरण बनाउन सरकार गम्भीर बन्नुपर्ने बताइन् ।
धितालले एमबीबीएस अध्ययन पूरा गर्न विद्यार्थीले लाखौँ रुपैयाँ खर्च गर्ने उल्लेख गर्दै इन्टर्न डाक्टरले पाउने पारिश्रमिकमा सरकारी र निजी मेडिकल कलेजबीच ठूलो अन्तर रहेको बताइन् । उनका अनुसार निजी मेडिकल कलेजमा इन्टर्न डाक्टरले औसत १० हजार रुपैयाँ र सरकारी मेडिकल कलेजमा औसत २४ हजार रुपैयाँ पेरिफेरी पाउने अवस्था छ ।
उनले सरकारी र निजी मेडिकल कलेजका लागि एउटै मापदण्ड लागू गर्न कठिन भए पनि पारिश्रमिकमा देखिएको ठूलो अन्तर न्यायोचित नभएको बताइन् । “कम्तीमा दुःख र अपमानलाई सरकारी र निजी नबनाऔँ। इन्टर्न डाक्टरलाई कतिसम्म पारिश्रमिक दिने भन्ने स्पष्ट कार्यविधि बनाएर कार्यान्वयन गरौँ,” उनले भनिन् ।
धितालले इन्टर्न डाक्टरको पारिश्रमिकमा देखिएको विभेद अन्त्य गर्न सरकारले स्पष्ट नीति तथा कार्यविधि बनाउनुपर्नेमा जोड दिइन् । निजी मेडिकल कलेजहरूले सरकारले तोकेको व्यवस्था पालना गरिरहेको दाबी गर्ने गरेको उल्लेख गर्दै उनले सरकारलाई आफ्नै प्रतिबद्धता पूरा गर्न आग्रह गरिन् ।
“निजी मेडिकल कलेज भन्छ, सरकारले भनेको कुरा हामीले मानिरहेका छौँ । अनि सरकारले आफैँले गरेको वाचा पूरा गर्नुपर्दैन?” उनले प्रश्न गरिन् । चिकित्सक पलायनको समस्या गम्भीर बन्दै गएको भन्दै धितालले चिकित्सकलाई स्वदेशमै टिकाउन राज्यले सुरक्षा, सम्मान र उचित कार्य वातावरण सुनिश्चित गर्नुपर्ने बताइन् ।
