वीरगंजस्थित नारायणी अस्पतालमा सर्पले टोकेपछि उपचारका क्रममा प्रयोग हुने एन्टी स्नेक भेनम (A.S.V.) इन्जेक्सन अभाव भएको छ ।
अस्पताल प्रशासनले मंगलबार सार्वजनिक गरेको सूचनामार्फत सर्पदंशपछि लगाइने ए.एस.भी. इन्जेक्सन हालसम्म सम्बन्धित तालुक कार्यालयबाट प्राप्त नभएको जानकारी गराएको हो । अस्पताल प्रशासनले ए.एस.भी. इन्जेक्सन मौज्दातमा नरहेको व्यहोरा सबैमा जानकारी गराउँदै यसका कारण बिरामीहरूमा पर्न जाने असुविधाप्रति क्षमायाचना गरेको छ ।
अस्पताल प्रशासनले जारी गरेको सूचनामा भनिएको छ, “यस अस्पतालमा सर्पले टोकेपछि लगाइने इन्जेक्सन ए.एस.भी. हाल तालुक कार्यालयबाट प्राप्त नभएकोले इन्जेक्सन ए.एस.भी. मौज्दातमा नरहेको व्यहोरा सबैमा जानकारी गराइन्छ। साथै यसबाट बिरामीहरूमा पर्न जाने असुविधाप्रति क्षमाप्रार्थी छौँ ।”
सर्पदंशको उपचारमा ए.एस.भी. अत्यावश्यक औषधिका रूपमा प्रयोग हुने भएकाले बारा, पर्सा, राैतहट लगायतकाे क्षेत्रका लागि उपचारकाे केन्द्र बनेकाे नारायणी अस्पतालजस्तो ठूलो सरकारी अस्पतालमा यसको अभाव हुँदा सर्पदंशका बिरामी प्रभावित हुने अवस्था देखिएको छ ।
