राष्ट्रिय स्वतन्त्र पार्टी (रास्वपा) का सांसदहरूको संसद् बैठकमा उपस्थिति कमजोर देखिन थालेको छ । सत्ता पक्षकै सांसदहरू बैठकमा हाजिर गरेर बाहिरिने प्रवृत्ति बढेपछि प्रतिनिधिसभाको कामकारबाहीसमेत प्रभावित भएको छ ।
मंगलबार प्रतिनिधिसभाको बैठकमा खानी तथा खनिज पदार्थ विधेयकमाथि छलफलपछि निर्णयार्थ प्रस्तुत गर्ने क्रममा गणपूरक संख्या नपुगेपछि बैठक स्थगित भयो । संविधानको धारा ९४ अनुसार प्रतिनिधिसभाको बैठक सञ्चालनका लागि कम्तीमा ६९ जना सांसद उपस्थित हुनुपर्नेमा गणनाका क्रममा ६१ जना मात्रै उपस्थित देखिएका थिए ।
उद्योगमन्त्री गौरीकुमारी यादवले विधेयकमाथिको छलफलमा उठेका प्रश्नको जवाफ दिएपछि सभामुख डोलप्रसाद अर्यालले विधेयकलाई निर्णयार्थ प्रस्तुत गरेका थिए । त्यसै क्रममा कांग्रेस सचेतक निस्कल राईले गणपूरक संख्या नपुगेको भन्दै गणना गर्न माग गरे । सभामुखले तीन मिनेट घन्टी बजाएर गणना गराउँदा आवश्यक संख्या नपुगेपछि बैठक स्थगित गरिएको हो ।
संसद् सचिवालयका अनुसार बैठक सुरु हुँदा २२० भन्दा बढी सांसद उपस्थित थिए । तर बैठक अघि बढ्दै जाँदा सांसदहरू बाहिरिँदै गएपछि निर्णय गर्ने समयमा गणपूरक संख्या पुग्न सकेन । रास्वपाले झण्डै दुईतिहाइ बहुमतसहित प्रतिनिधिसभामा प्रवेश गरेपछि गणपूरक संख्या नपुगेको यो पहिलो घटना भएको बताइएको छ । बैठक स्थगित भएपछि खानी तथा खनिज पदार्थ विधेयकमाथिको विचार गरियोस् भन्ने प्रस्तावसमेत पारित हुन सकेन । अब उक्त प्रस्ताव आगामी भदौ १ गते बस्ने बैठकमा अघि बढाइनेछ ।
सांसदहरू बैठकमा हाजिर गरेर मन्त्रालय तथा अन्य कामका लागि बाहिरिने गरेको आरोपसमेत लाग्दै आएको छ । मंगलबार संसद् बैठक चलिरहेकै समयमा केही सांसद मन्त्रालय धाइरहेको दृश्य देखिएको थियो। यसले कानुन निर्माणलाई सांसदहरूको प्राथमिकतामाथि प्रश्न उठाएको छ । रास्वपा संसदीय दलका नेता वालेन्द्र शाह संसद् बैठकमा नियमित उपस्थित नभएको, उपनेता गणेश पराजुली विदेश भ्रमणमा रहेको तथा मुख्य सचेतक कविन्द्र बुर्लाकोटीको पनि प्रभावकारी नेतृत्व देखिन नसकेको भन्दै पार्टीभित्रै प्रश्न उठ्न थालेको छ ।
यद्यपि रास्वपाले सांसदहरूको उपस्थिति कमजोर भएको विषयलाई गम्भीर रूपमा लिएको जनाएको छ । पार्टीले संसद् सचिवालयबाट सांसदहरूको हाजिरी विवरण झिकाएर विश्लेषण गर्न सचेतक प्रकाशचन्द्र परियार र क्रान्तिशिखा धिताललाई जिम्मेवारी दिएको छ ।
रास्वपाले सांसदहरूको हाजिरी तथा संसद् गतिविधिको समीक्षा गर्न लागेको जनाएको छ । साथै आगामी साउन २९ देखि ३१ गतेसम्म सांसदहरूलाई तीनदिने ‘क्लोज क्याम्प’मा राखेर प्रशिक्षण दिने तयारीसमेत गरेको छ । गणपूरक संख्या नपुगेपछि रास्वपाकै सांसदहरूले समेत असन्तुष्टि व्यक्त गरेका छन् । सांसद गणेश कार्कीले आफू दिनभर सदनमा उपस्थित भए पनि अन्य सांसदको अनुपस्थितिका कारण माफी माग्नुपर्ने अवस्था आएको बताएका छन् ।
सचेतक क्रान्तिशिखा धितालले सामाजिक सञ्जालमार्फत पार्टीले सफलताको चुली चुम्न हतार गर्दा ‘जुत्ता फेदीमै छुटेको’ टिप्पणी गरेकी छन् । सांसद आशिका तामाङले भने सांसदहरू जनताका गुनासा लिएर मन्त्रालय धाउनुपर्ने अवस्थाका कारण संसद्मा उपस्थिति प्रभावित भएको तर्क गरेकी छन् ।
सांसदहरूको मुख्य जिम्मेवारी कानुन निर्माण, सरकारलाई जवाफदेही बनाउने र जनताका विषय संसद्मार्फत उठाउने भएकाले बैठकमा नियमित र प्रभावकारी उपस्थिति आवश्यक हुन्छ । सत्ता पक्षकै सांसदहरूको कमजोर उपस्थितिले संसद्को प्रभावकारिता र रास्वपाले अघि सारेको सुशासनको नारामाथि समेत प्रश्न उठाएको छ ।
