धनुषा जिल्ला अदालतको मूल गेटअगाडि मिटरब्याज पीडित महिलाले आत्मदाहको प्रयास गरेपछि प्रहरीले समयमै उद्धार गरेको छ ।
आत्मदाहको प्रयास गरिरहेकी महिलालाई जोगाउने क्रममा प्रहरी निरीक्षक अरविन्द साह स्वयं जोखिममा परी महिलाको ज्यान जोगाएका छन् । बुधबार दिउँसो मिटरब्याज पीडितहरूले अदालतअगाडि विरोध प्रदर्शन गरिरहेका बेला जनकपुरधाम उपमहानगरपालिका–४ की फुलकुमारी रजकले शरीरमा पेट्रोल खन्याएर आत्मदाहको प्रयास गरेकी थिइन् ।
प्रदर्शनमा प्रहरी निरीक्षक साहको कमाण्डमा प्रहरी टोली परिचालन गरिएको थियो । रजकले कालो प्लास्टिकमा लुकाएर बोतलमा पेट्रोल ल्याएको कसैले थाह पाएका थिएन् । प्रदर्शनमा मिहला तनावमा रहेको र उक्त बोतल उचाली उचाली नारा लगाइरहेको देखिन्छ । प्रदर्शन सकिन लाग्दा उनले अचानक शरीरमा पेट्रोल खन्याएर आत्मदाहको प्रयास गरेपछि प्रहरी निरिक्षक साहले कुदेर उनको हातबाट पेट्रोलको बोतल छिनेका थिए ।
प्रहरी निरीक्षक साहले सलाई कोर्नुअघि नै रजकको हातबाट पेट्रोलको बोतल खोसेका थर्एि । बोतल खोस्ने क्रममा पेट्रोल साहको पोशाकमा समेत छरिएको थियो । प्रत्यक्षदर्शीका अनुसार केही सेकेन्ड ढिला भएको भए महिला र प्रहरी निरीक्षक साह दुवै आगोको जोखिममा पर्न सक्ने अवस्था थियो ।
प्रहरीले रजकलाई तत्काल उद्धार गरी प्रादेशिक अस्पताल जनकपुर पठाएको छ । मिटरब्याजसम्बन्धी मुद्दामा पक्राउ परेका गोपाल साह, रेखा साह र हरेराम साहविरुद्ध धनुषा जिल्ला अदालतमा थुनछेक बहस भइरहेको छ । उनीहरूको पेसीका क्रममा दबाब दिन मिटरब्याज पीडितहरू गोविन्दकुमार साहको नेतृत्वमा भूतनाथ मन्दिरनजिक भेला भएर पैदल र्याली निकालेका थिए ।
र्याली कदमचोक, जिल्ला प्रशासन कार्यालय र जिल्ला प्रहरी कार्यालय हुँदै जिल्ला अदालतको मूल गेटअगाडि पुगेर विरोध प्रदर्शनमा परिणत भएको थियो । पीडितहरूले आफूहरूमाथि भएको अन्यायको न्यायिक समाधान, दोषीमाथि कारबाही तथा आफूहरूले न्याय पाउनुपर्ने माग गर्दै प्रदर्शन गरेका थिए ।
