११औँ राष्ट्रिय खेलकुद प्रतियोगिता मधेश प्रदेशमा आयोजना हुने भएको छ ।
राष्ट्रिय खेलकुद परिषद् (राखेप) को बिहीबार बसेको १२५औँ बोर्ड बैठकले ११औँ राष्ट्रिय खेलकुद मधेश प्रदेशमा आयोजना गर्ने निर्णय गरेको हो ।
मधेश प्रदेश खेलकुद विकास परिषद्का सदस्यसचिव शिवजी गुप्ताका अनुसार कर्णाली प्रदेशमा आयोजना हुने १०औँ राष्ट्रिय खेलकुदको मिति तय भएसँगै ११औँ प्रतियोगिताको आयोजनास्थलसमेत टुंगो लगाइएको हो। गुप्ता राखेपको बोर्ड बैठकमा सहभागी थिए ।
बैठकले पटक–पटक स्थगित हुँदै आएको १०औँ राष्ट्रिय खेलकुद प्रतियोगिता आगामी मंसिर १६ देखि २९ गतेसम्म कर्णाली प्रदेशको सुर्खेतमा आयोजना गर्ने निर्णय गरेको छ ।
बैठकमा राखेपका अध्यक्ष तथा शिक्षा तथा खेलकुदमन्त्री सस्मित पोखरेल, सदस्यसचिव रामचरित्र मेहता, प्रदेश खेलकुद विकास परिषद्का प्रमुख, राखेप बोर्डका पदाधिकारी तथा सदस्य र सम्बन्धित सरोकारवाला निकायका प्रतिनिधिको सहभागिता रहेको थियो ।
११औँ राष्ट्रिय खेलकुद मधेश प्रदेशमा आयोजना गर्ने निर्णयसँगै प्रदेशमा खेलकुद पूर्वाधार विकास तथा प्रतियोगिता तयारी अघि बढाउने बाटो खुलेको छ ।
