वीरगंज महानगरपालिका–११, श्रीपुरमा नवनिर्मित श्री गणेशजी महाराज मन्दिरको प्राणप्रतिष्ठा महोत्सवका अवसरमा शुक्रबार भव्य कलश यात्रा (जलयात्रा) सम्पन्न भएको छ । बिहानैदेखि हजारौँ श्रद्धालु भक्तजन, महिला, युवती तथा बालबालिकाको उत्साहजनक सहभागितामा सम्पन्न कलश यात्राले श्रीपुर क्षेत्रलाई दिनभर धार्मिक तथा भक्तिमय बनाएको थियो ।
सनातन हिन्दु धर्म परम्पराअनुसार कुनै पनि शुभकार्य, यज्ञ, महायज्ञ तथा प्राणप्रतिष्ठा जस्ता धार्मिक अनुष्ठानअघि विघ्नहर्ता भगवान् श्री गणेशको पूजा–आराधना गर्ने धार्मिक मान्यता रहेको छ । सोही परम्पराअनुसार प्राणप्रतिष्ठा महोत्सवको प्रमुख कार्यक्रमअन्तर्गत कलश यात्राको आयोजना गरिएको मन्दिर व्यवस्थापन समितिले जनाएको छ ।
श्री गणेशजी महाराज मन्दिर परिसरबाट सुरु भएको कलश यात्रा कृषि औजार कारखाना क्षेत्र हुँदै घडीअर्वा पोखरी पुगेको थियो। त्यहाँ वैदिक मन्त्र उच्चारणका साथ धार्मिक विधिअनुसार जलपूजन गरी पवित्र जल कलशमा भरिएको थियो । त्यसपछि श्रद्धालुहरूले टाउकामा कलश बोकेर भजन–कीर्तन, जयघोष तथा धार्मिक झाँकीसहित वीरगञ्जका विभिन्न मुख्य सडकको परिक्रमा गरेका थिए ।
घण्टाघर क्षेत्र हुँदै पुनः श्री गणेशजी महाराज मन्दिर परिसरमा पुगेपछि कलश यात्रा सम्पन्न भएको थियो । यात्राभर स्थानीय बासिन्दाले श्रद्धालुलाई स्वागत गर्दै विभिन्न स्थानमा खानेपानी तथा शीतल पेयको व्यवस्था गरेका थिए । धार्मिक यात्राको सुरक्षाका लागि नेपाल प्रहरी, सशस्त्र प्रहरी तथा स्वयंसेवक परिचालन गरिएको थियो भने यातायात व्यवस्थापनका लागि आवश्यक समन्वयसमेत गरिएको आयोजकले जनाएको छ ।
कलश यात्रामा परम्परागत पहेँलो, रातो तथा केशरिया रंगका धार्मिक पोसाकमा सजिएका महिला तथा युवतीहरूको उल्लेख्य सहभागिता रहेको थियो । भजन–कीर्तन, शंखध्वनि, ढोल–नगाडा र वैदिक मन्त्र उच्चारणले श्रीपुरसहित आसपासको क्षेत्र दिनभर भक्तिमय बनेको थियो ।
आयोजकका अनुसार मन्दिरको प्राणप्रतिष्ठा महोत्सवअन्तर्गत वैदिक पूजा, हवन, रुद्राभिषेक, विशेष आरती, प्रसाद वितरण तथा धार्मिक प्रवचनलगायतका कार्यक्रमहरू पनि सञ्चालन भइरहेका छन् । प्राणप्रतिष्ठापछि भगवान् श्री गणेशजी महाराजको नियमित पूजा–आराधना, दर्शन तथा धार्मिक गतिविधि सञ्चालन गरिने जनाइएको छ ।
स्थानीय बासिन्दाले नवनिर्मित मन्दिरले श्रीपुर क्षेत्रको धार्मिक, सांस्कृतिक तथा सामाजिक गतिविधिलाई थप सशक्त बनाउने विश्वास व्यक्त गरेका छन् ।
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
