रौतहटको गुजरा नगरपालिका–७ मा सर्पले टोकेका सात वर्षीय बालकको झारफुक गराउने क्रममा मृत्यु भएको छ ।
स्थानीय लालबाबु रामका छोरा छोटेलाल रामलाई शुक्रबार बिहान करिब ३ बजे विषालु सर्पले टोकेको थियो । सर्पले टोकेपछि परिवारले तत्काल अस्पताल लैजानुको सट्टा गाउँकै झाँक्रीकहाँ लगेर झारफुक गराएका थिए ।
झारफुककै क्रममा बालकको अवस्था गम्भीर बन्दै गएपछि परिवारले उनलाई चन्द्रपुरस्थित सरकारी अस्पताल पुर्याएका थिए । अस्पताल पुर्याउँदा चिकित्सकले बालकलाई मृत घोषणा गरेका हुन् । सर्पदंशपछि समयमै उपचार नपाउँदा बालकको मृत्यु भएको हो । घटनाले ग्रामीण क्षेत्रमा अझै पनि सर्पदंशको उपचारका लागि स्वास्थ्य संस्थामा जानुको सट्टा झारफुकमा निर्भर हुने प्रवृत्ति जोखिमपूर्ण रहेको देखाएको छ ।
विषालु सर्पले टोकेपछि विषको असर तीव्र रूपमा फैलिन सक्ने भएकाले झारफुक वा अन्य परम्परागत उपचारमा समय बिताउनुको सट्टा तत्काल नजिकको स्वास्थ्य संस्था वा सर्पदंश उपचार केन्द्रमा पुर्याउन स्वास्थ्यकर्मीले आग्रह गर्दै आएका छन् ।
वर्षायाममा सर्पदंशका घटना बढ्ने भएकाले स्थानीय तह तथा स्वास्थ्य संस्थाले ग्रामीण क्षेत्रमा जनचेतनामूलक अभियान सञ्चालन गर्नुपर्ने आवश्यकता देखिएको छ । सर्पले टोकेमा प्राथमिक उपचारका नाममा गलत विधि अपनाउनुको सट्टा सकेसम्म छिटो स्वास्थ्य संस्थामा पुर्याउनुपर्ने चिकित्सकहरूको सुझाव छ ।
