युवा, श्रम तथा रोजगार मन्त्रालय र नेपाल वैदेशिक रोजगार व्यवसायी संघबीच सहमति भएपछि व्यवसायीले घोषणा गरेका आन्दोलनका सबै कार्यक्रम तत्कालका लागि स्थगित भएका छन् ।
वैदेशिक रोजगारीलाई पारदर्शी, सुरक्षित र मर्यादित बनाउन वैदेशिक रोजगार ऐन तथा नियमावली संशोधनको प्रक्रिया छिटो टुंग्याउने सहमति सरकार र व्यवसायीबीच भएको हो। यही सहमतिपछि संघले आन्दोलनका कार्यक्रम स्थगित गरेको जनाएको छ ।
संघले गत साउन २२ गते १५ बुँदे माग अघि सार्दै आन्दोलन सुरु गरेको थियो। आन्दोलनकै कार्यक्रमअन्तर्गत आजदेखि गन्तव्य मुलुकमा श्रमिक पठाउन रोक्ने घोषणा व्यवसायीले गरेका थिए ।
युवा, श्रम तथा रोजगारमन्त्री रामजी यादवको उपस्थितिमा मन्त्रालय र व्यवसायीबीच भएको छलफलपछि आन्दोलन स्थगित गरिएको संघका अध्यक्ष डिकबहादुर खत्रीले बताउनुभयो ।
उहाँका अनुसार व्यवसायीका माग सम्बोधन गर्न समय लाग्ने भएकाले आन्दोलन स्थगित गरिएको हो । संघले अघि सारेका १५ बुँदे मागमध्ये अधिकांश नीतिगत विषय भएकाले तिनलाई वैदेशिक रोजगार ऐन तथा नियमावली संशोधन प्रक्रियामा समेट्ने सहमति भएको खत्रीले बताउनुभयो । ‘संघका तर्फबाट प्रस्तुत माग यथावत छन्। तर कतिपय विषय ऐन संशोधनमा समेटिने भएकाले केही समय आन्दोलन स्थगित गर्ने निर्णय गरेका छौँ,’ उहाँले भन्नुभयो ।
व्यवसायीका अन्य मागका सम्बन्धमा आवश्यक प्रमाण र कागजातसहित वैदेशिक रोजगार विभागमा निवेदन दिए विभागले सहजीकरण गर्ने सहमति भएको छ । विभागबाट समस्या समाधान हुन नसके मन्त्रालयमार्फत सम्बोधन गर्ने जानकारी व्यवसायीलाई दिइएको छ ।
संघले यसअघि माग सम्बोधन नभए गन्तव्य मुलुकमा श्रमिक पठाउने काम रोक्ने चेतावनीसहित आन्दोलनका कार्यक्रम घोषणा गरेको थियो । सरकारसँग भएको सहमतिपछि तत्कालका लागि ती सबै कार्यक्रम रोकिएका छन् ।
