राष्ट्रिय स्वतन्त्र पार्टी (रास्वपा)ले संसदीय दलको विधान संशोधन गर्न कार्यदल गठन गरेको छ ।
बुधबार सिंहदरबारमा बसेको रास्वपा संसदीय दलको बैठकले विधानलाई समयानुकूल बनाउन प्रमुख सचेतकको संयोजकत्वमा विधान संशोधन कार्यदल गठन गरेको संसदीय दलका उपनेता गणेश पराजुलीले जानकारी दिनुभयो।
कार्यदललाई सात दिनभित्र संशोधित विधानको मस्यौदा तथा कार्यविधि तयार गर्ने जिम्मेवारी दिइएको छ। संशोधित विधानमार्फत सांसदलाई संसद्मा उपस्थित हुँदा मर्यादा पालना गराउने, सांसदका जिम्मेवारी स्पष्ट पार्ने, जनपक्षीय आवाजलाई प्रभावकारी रूपमा उठाउने तथा कानुन निर्माण प्रक्रियामा थप सक्रिय बनाउने उद्देश्य राखिएको पराजुलीले बताउनुभयो।
बैठकमा रास्वपाबाट सरकारमा सहभागी मन्त्रीहरूले आ–आफ्नो मन्त्रालयबाट भएका काम, प्रगति तथा गतिविधिबारे जानकारी गराएका थिए। सांसदहरूले भने आफ्ना निर्वाचन क्षेत्रका समस्या, जनताबाट प्राप्त गुनासा तथा सरकारका कामकारबाहीमा देखिएका कमजोरीबारे धारणा राखेका थिए।
सरकारले काम गरिरहे पनि त्यसको सन्देश प्रभावकारी रूपमा आम जनतासम्म पुग्न नसकेको विषयमा बैठकमा आत्मसमीक्षा गरिएको उपनेता पराजुलीले बताउनुभयो।
बैठकमा बजारमा देखिएको खाना पकाउने एलपी ग्यासको अभावबारे समेत सांसदहरूले प्रश्न उठाएका थिए। सांसदहरूले वैशाखमा बजारमा करिब २२ लाख सिलिन्डर ग्यास आपूर्ति भएकोमा साउनमा आपूर्ति बढेर करिब ४० लाख सिलिन्डर पुग्दा पनि बजारमा अभाव किन देखियो भन्ने विषयमा मन्त्रीहरूसँग जानकारी मागेका थिए।
जवाफमा सम्बन्धित मन्त्रीहरूले ग्यास अभाव हुनुका प्राविधिक तथा व्यवस्थापकीय कारणबारे जानकारी गराउँदै समस्या समाधानका लागि भइरहेको प्रयासबारे बैठकलाई अवगत गराएका थिए।
रास्वपाले संसदीय दलको आन्तरिक कार्यसम्पादनलाई थप व्यवस्थित र प्रभावकारी बनाउने उद्देश्यले विधान संशोधन प्रक्रिया अघि बढाएको जनाएको छ।
