बारा | बाराको जितपुरसिमरा उपमहानगरपालिका–३ रेल्वेलाइनस्थित चुनाभट्टामा आयोजित खुला रक्तदान कार्यक्रममा ७२ जनाले रक्तदान गरेका छन् ।
श्री पुण्डेश्वर एकादशी समूहको आयोजनामा सम्पन्न कार्यक्रममा १७ जना महिला र ५५ जना पुरुष गरी ७२ जनाले रक्तदान गरेको आयोजकले जनाएको छ ।
जितपुरसिमरा उपमहानगरपालिकाका उपप्रमुख भोला अधिकारीको प्रमुख आतिथ्यतामा कार्यक्रम सम्पन्न भएको हो। कार्यक्रममा समूहकी सचिव शिक्षा ढुंगानाले पहिलो रक्तदान गरी कार्यक्रमको उद्घाटन गरेकी थिइन् ।
रक्तदान कार्यक्रम सञ्चालनका लागि विभिन्न सहयोगी मनबाट २२ हजार ९२ रुपैयाँ आर्थिक सहयोग प्राप्त भएको आयोजकले जनाएको छ ।
कार्यक्रममा पाथीभरा इङ्लिस बोर्डिङ स्कुलले फ्रुटी तथा ग्लुकोज, सिमरा दूध डेरीले ५३ लिटर दूध र अमृत डेरीले रक्तदाताका लागि प्रमाणपत्र सहयोग गरेको थियो ।
त्यस्तै, गुप्ता इन्जिनियरिङ एन्ड कन्स्ट्रक्सन प्रालिका सञ्चालक बिकेश गुप्ताले रक्तदातालाई प्रोत्साहनस्वरूप एक कार्टुन अण्डा सहयोग गरेका थिए । उनले आगामी दिनमा समेत सामाजिक तथा मानवीय सेवाका कार्यमा निरन्तर सहयोग गर्ने प्रतिबद्धता व्यक्त गरेका छन् ।
रक्तदान कार्यक्रमबाट संकलित रगतले आवश्यक परेका बिरामीलाई सहयोग पुग्ने आयोजकले जनाएको छ। श्री पुण्डेश्वर एकादशी समूहले आगामी दिनमा पनि रक्तदानलगायत सामाजिक तथा मानवीय सेवाका कार्यक्रमलाई निरन्तरता दिने जनाएको छ ।
