धरान – धरान उपमहानगरपालिकाका मेयर हर्क साम्पाङले प्रधानमन्त्री केपी शर्मा ओलीले आफूलाई ‘फेस गर्न नसकेको’ प्रतिक्रिया दिएका छन् । मंगलबार दिउँसो प्रधानमन्त्रीसँग भेट्न सिंहदरबार पुगेका साम्पाङले भेट्न नपाएपछि सामाजिक सञ्जालमा आफ्नो असन्तुष्टि व्यक्त गरेका हुन् ।
मेयर साम्पाङले सामाजिक सञ्जालमा लेखेका छन्, “केपी ओलीले फेस गर्न सकेनन्, मलाई।” तर, प्रधानमन्त्रीको सचिवालयले मेयर साम्पाङसँग भेट्ने कुनै कार्यक्रम तय नभएको स्पष्ट पारेको छ ।
खानेपानीको माग गर्दै धराने नागरिक काठमाडौंमा
मेयर साम्पाङ सोमबार धरानका नागरिकहरूको टोलीसँगै काठमाडौं आएका थिए। धरानका बासिन्दालाई खानेपानीको समस्या समाधान गर्न माग राख्दै उनीहरूले प्रदर्शन गरेका थिए । साम्पाङ आफैंले रित्तो गाग्री बोकेर सिंहदरबार पुगेर विरोध जनाएका थिए ।
सिंहदरबार प्रवेशमा अवरोध
मंगलबार सिंहदरबार प्रवेश गर्ने क्रममा प्रहरीले साम्पाङको गाग्री लैजान रोक लगाएको थियो । गाग्रीसहितको प्रदर्शनलाई सिंहदरबारभित्र लैजान नमिल्ने भन्दै सुरक्षा निकायले अवरोध गरेको थियो ।
धरानका नागरिकको मागलाई केन्द्रमा राखेर काठमाडौं आइपुगेका साम्पाङले आफ्नो अभियानमा प्रधानमन्त्रीसँग प्रत्यक्ष संवाद हुन नसकेकोमा असन्तोष व्यक्त गरेका छन् ।
