काठमाडौँ कीर्तिपुरको क्रिकेट रङ्गशालामा जारी नेपाल प्रेमियर लिग (एनपिएल) क्रिकेटमा यतिबेला सबैको प्यारो नाम बन्नुभएको छ राहुल यादव ।
यादवलाई क्रिकेटर तथा क्रिकेट समर्थकले ‘फ्युचर अफ नेपाली क्रिकेट’ भन्न थालिसकेका छन् । त्यसो भन्नु पनि स्वाभाविक नै हो । नेपाली राष्ट्रिय व्रिmकेट टिमबाट बर्सौंदेखि क्रिकेट खेल्दै आएका बलरहरू भन्दा रौतहटका राहुलले धारिलो बलिङ गर्दै अहिले सबैको ध्यान तानिरहेका छन् । ‘ट्यालेन्ट हन्ट’ बाट जनकपुर बोल्ट्समा आबद्ध भएर तेस्रो संस्करणको एनपिएल खेलिरहेका राहुलको जीवनी झन् चाख लाग्दो छ ।
१६ वर्षीय राहुल रौतहटको बौधीमाई नगरपालिका–१, अजगैवी गाउँका स्थानीय हुनुहुन्छ । राहुलको पारिवारिक अवस्था असाध्य दयनीय छ । गाउँमा बाँसको बेराघेरा र टायलले छाएको अत्यन्त जीर्ण कच्ची घर छ । बुवा वीरबहादुर र आमा पनापति देवीले खेतीकिसानी गरेर राहुलको पालनपोषण गर्नुहुन्छ ।
राहुलको जेठो दाइ कमलेश रुपन्देहीमा स्वास्थ्यकर्मीका रूपमा काम गर्नुहुन्छ भने दिदी सकुन्तलाको विवाह भइसकेको छ । घरमा राहुल र उहाँका बुवा, आमा मात्र बस्नुहुन्छ । राहुलको परिवारमा कच्ची घर र गाउँमै १२ कट्ठा जग्गा छ । कक्षा ९ मा पढ्ने राहुलले विगत चार वर्षदेखि रौतहटम आयोजना भएका विभिन्न व्रिmकेट प्रतियोगितामा सहभागिता जनाउँदै आएको दाइ कमलेशले बताउनुभयो ।
भत्किन लागेको कच्ची घरमा राहुलले विभिन्न प्रतियोगितामा जितेका सिल्ड, मेडल र प्रमाणपत्रहरू प्रशस्त छन् । भत्किन लागेको झुपडीमा अहिले एनपिएलमा राहुलको प्रदर्शन र प्रशंसाका कारण उल्लास छाएको छ । राहुलका बुवा वीरबहादुरले सुरु सुरुमा छोराले व्रिmकेट खेलका लागि जिद्दी गर्दा चिन्ता लागे पनि अहिले एकाएक उत्कृष्ट खेल पस्किएर चर्चा कमाउँदा असाध्य खुसी लागेको बताउनुभयो । उहाँले भन्नुभयो, “हाम्रो आर्थिक स्थिति कमजोर भएकाले उसले भने जस्तो क्रिकेट खेल्न सहयोग गर्न सकिएको थिएन । जग्गा बेचेर भए पनि खेल्छुभन्दा बिग्रने भो भन्ने चिन्ता लाथ्यो तर आज जुन किसिमले प्रशंसा बटुलिरहेको छ, त्यसमा हामी असाध्य हर्षित छौँ ।”
वीरबहादुरका अनुसार एनपिएलमा देखाएको खेल कौशलपछि राहुलको घर हेर्न र उहाँकाबारे बुझ्न अहिले धेरै मानिस आइरहन्छन् । राहुलको घर मात्र कच्ची छैन, त्यहाँसम्म पुग्न गौर–गरुडा सडकको जयनगर चोकबाट करिब १५ किलोमिटरजति पश्चिमतर्फ दयनीय सडक भएर पुग्नु पर्छ ।
अजगैवी गाउँबाट राहुलको घरसम्म पुग्ने अत्यन्त साँघुरो र जीर्ण सडक छ । राहुलको परिवारले अहिले उहाँको छलाङ देखेर सबै दुःखकष्ट भुलेका छन् भने यसअघि राखेका प्रस्ताव स्वीकार गर्न नसकेकाप्रति पश्चाताप मानिरहेको छ । आमा पनापतिले छोराको प्रगतिपछि छरछिमेकी, गाउँले सबैले तारिफ गर्न थालेका बताउनुभयो । उहाँले भन्नुभयो, “छोराले क्रिकेटमा राम्रो गरेपछि अहिले त छरछिमेकी र गाउँले सबैले बधाई मात्र भन्छन् । सबैजना हाँसी खुसी बोल्न थालेका छन् ।”
राहुलले एनपिएलको जारी संस्करणमा तीन खेल खेल्दा छ विकेट लिइसक्नुभएको छ । राहुलको प्रभावशाली खेलका कारण उहाँका साथीभाइ, गाउँलेसँगै व्रिmकेटमा प्रोत्साहन गर्नेहरू निकै उत्साहित छन् । उहाँले रौतहटको चन्द्रपुर नगरपालिका–८ स्थित कोटीहोम मैदानमा आएर अभ्यास गर्ने गर्नुहुन्छ । जनकपुर बोल्ट्सले उदयीमान खेलाडीका रूपमा राहुललाई छनोट गरेर लाँदादेखि नै खुसी रहेका चन्द्रपुरका व्रिmकेटर देवराज कार्की राहुललाई नेपाली व्रिmकेटको भविष्यका रूपमा चित्रण गर्नुहुन्छ ।
कार्कीकै पहलमा गत असोज २२ गते चन्द्रपुरमा भएको ट्यालेन्ट हन्ट कार्यव्रmममा राहुल छनोट हुनुभएको थियो । कार्कीले भन्नुभयो, “हेर्दै जानूस्, राहुल एक दिन नेपालको वेस्ट बलरका रूपमा उदाउँछ । हामीले त छिट्टै राष्ट्रिय टिममा मौका पाउने आधार देखिसकेका छौँ ।” राहुल अत्यन्त कडा प्रतिस्र्पा गर्ने खेलाडी रहेका प्रशिक्षक कार्कीको भनाइ छ । मध्यगतिका बलर राहुलले स्थानीयस्तरमा आयोजना हुने प्रतियोगितामा विपक्षी टिमको ब्याटिङ लाइनअपलाई ध्वस्त पार्ने गरेको कार्कीको भनाइ छ ।
डेब्यु एनपिएलमै तहल्का मच्चाएका राहुल निखारिँदै जाँदा खतरनाक बलर बनेर निस्कने कार्कीले विश्वास व्यक्त गर्नुभएको छ ।
