नेपाल प्रिमियर लिग (एनपीएल) अन्तर्गत बिहीबारको पहिलो खेलमा साविक विजेता लुम्बिनी लायन्स र पहिलो संस्करणको विजेता जनकपुर बोल्ट्सबीच प्रतिस्पर्धा हुँदैछ ।
खेलमा जनकपुर बोल्ट्सले टस जितेर पहिले बलिङ गर्ने निर्णय गरेको छ । जनकपुरले टस जितेसँगै लुम्बिनी लायन्सले पहिले ब्याटिङ गर्ने भएको छ ।
साविक विजेता लुम्बिनी लायन्स यस सिजन अपराजित रहने एक्लो टोली हो । तीन खेल खेलेको लुम्बिनी ५ अंकसहित अंकतालिकाको शीर्ष स्थानमा रहेको छ । यता, जनकपुर बोल्ट्सले चार खेलबाट दुई जित र दुई हारसहित ४ अंक जोडेको छ ।
आजको खेलका लागि दुवै टोलीले आफ्नो प्लेइङ–११ मा परिवर्तन गरेका छन् । लुम्बिनीले अभिषेक गौतमको स्थानमा दिलीप नाथलाई पहिलो रोजाइमा समेटेको छ ।
यस्तै, जनकपुरले दुई खेलाडी परिवर्तन गरेको छ । अमर सिंह राउटेला र मोइन अलीको स्थानमा आदित्य महता र परवेज हुसेन इमोनलाई टोलीमा समावेश गरिएको छ ।
मोइन अलीले जनकपुरका लागि सुरुवाती चार खेल खेलेपछि अबुधाबी टी–१० लिग खेल्न गएका छन् ।
आजको प्रतिस्पर्धाले दुवै टोलीको अंकतालिकामा थप प्रभाव पार्नेछ ।
