प्रहरीले ६ लाख रुपैयाँभन्दा बढी मूल्यका विभिन्न प्रकारका पटाकासहित दुई जना भारतीय नागरिकलाई पक्राउ गरेको छ ।
पक्राउ पर्नेमा भारतको मोतिहारी जिल्ला घर भई हाल कालिका नगरपालिका–६ हरिहरटोल बस्ने ४१ वर्षीय सञ्जय साह तेली र सोही ठाउँका २९ वर्षीय कन्हैया कुमार रहेका छन् । कन्हैया हाल भरतपुर महानगरपालिका–३ बाह्रघरेमा बस्दै आएका छन् ।
जिल्ला प्रहरी कार्यालयका प्रमुख एवं प्रहरी उपरीक्षक रामेश्वर पौडेलका अनुसार जिल्लाका विभिन्न स्थानबाट भिरझिरे, खुर्सानी, चक्र, रकेटलगायतका पटाका बरामद गरिएको हो ।
प्रहरीले उनीहरूको साथबाट ८० हजार ३७२ वटा पटाका बरामद गरेको छ। बरामद पटाकाको मूल्य ६ लाख २३ हजार ४६५ रुपैयाँ रहेको प्रहरीले जनाएको छ। साथै, उनीहरूको साथबाट नगद १ लाख ७२ हजार ३०० रुपैयाँसमेत बरामद गरिएको छ ।
प्रहरी उपरीक्षक पौडेलले पटाकाजस्ता विस्फोटक पदार्थको अवैध कारोबार भइरहेकोबारे जानकारी भए नजिकको प्रहरी कार्यालयमा खबर गर्न सर्वसाधारणलाई आग्रह गरेका छन् ।
पक्राउ परेका दुवै जनामाथि विस्फोटक पदार्थको अवैध ओसारपसार तथा सञ्चयलगायतका कसुरमा म्याद थप गरी थप अनुसन्धान र कानुनी कारबाही अघि बढाइने प्रहरीले जनाएको छ ।
