बाराको जितपुरसिमरा उपमहानगरपालिका–२३ भलुहीमा ट्रकको ठक्करबाट मोटरसाइकलमा सवार दुई जनाको मृत्यु भएको छ ।
वीरगञ्ज–पथलैया सडकखण्डअन्तर्गत सागर आयल पेट्रोल पम्प नजिकै मंगलबार राति करिब ८ः३० बजे दुर्घटना भएको हो। ऐरोटेक ग्यास कम्पनीबाट निस्किएको ना.३ ख ५६१० नम्बरको एलपी ग्यास बोकेको ट्रक सर्भिस लेन हुँदै एक्सप्रेस वेतर्फ प्रवेश गर्ने क्रममा जितपुरबाट वीरगञ्जतर्फ जाँदै गरेको ना.४३ प ५१२२ नम्बरको मोटरसाइकललाई ठक्कर दिएको प्रहरीले जनाएको छ ।
ट्रकको ठक्करबाट मोटरसाइकलमा सवार दुवै जना गम्भीर घाइते भएका थिए। उनीहरूलाई तत्काल उपचारका लागि नारायणी अस्पताल वीरगञ्ज लगिएकोमा चिकित्सकले राति करिब ९ः१० बजे मृत घोषणा गरेका थिए ।
मृत्यु हुनेमा पर्साको वीरगञ्ज महानगरपालिका–१६ नगवाका ३५ वर्षीय रवीन्द्र उपाध्याय र बाराको करैयामाई गाउँपालिका–७ का ३० वर्षीय दिलीप चौधरी रहेका छन्। मोटरसाइकल कसले चलाइरहेको थियो भन्ने विषयमा प्रहरीले अनुसन्धान गरिरहेको जनाएको छ । दुर्घटनापछि इलाका प्रहरी कार्यालय जितपुरका प्रहरी नायब निरीक्षक उमेश निरौला र इलाका प्रहरी कार्यालय सिमराका प्रहरी निरीक्षक विनोदराज खत्रीको नेतृत्वमा प्राविधिकसहितको टोली घटनास्थल पुगेको थियो ।
प्रहरीले दुर्घटनामा संलग्न ट्रक र चालक चितवनको भरतपुर महानगरपालिका–७ का ५८ वर्षीय सुनिलराज पाठकलाई नियन्त्रणमा लिएको छ। ट्रक र चालकलाई इलाका प्रहरी कार्यालय सिमरामा राखिएको छ भने मोटरसाइकल इलाका प्रहरी कार्यालय जितपुरमा राखिएको प्रहरीले जनाएको छ ।
मृतक दुवैको शव परीक्षणका लागि नारायणी अस्पताल वीरगञ्जमा राखिएको छ। घटनाबारे थप अनुसन्धान भइरहेको प्रहरीले जनाएको छ ।
