ख्तियार दुरुपयोग अनुसन्धान आयोगले रौतहटको माधव नारायण नगरपालिकामा कार्यरत सामाजिक परिचालक कृष्ण नन्दन प्रसाद यादवविरुद्ध विशेष अदालत, काठमाडौंमा आरोपपत्र दायर गरेको छ ।
आयोगका अनुसार यादवले जागिरका लागि पेस गरेको शैक्षिक प्रमाणपत्र नक्कली रहेको सम्बन्धमा परेको उजुरीमाथि अनुसन्धान गर्दा उनले झुट्टा प्रमाणपत्रका आधारमा नियुक्ति लिई सरकारी सेवा–सुविधा लिएको पुष्टि भएको हो ।
यादवले जिल्ला विकास समिति, रौतहटअन्तर्गत स्थानीय ट्रष्ट कोष समितिमा सामाजिक परिचालक पदमा नियुक्ति लिने क्रममा ‘बिहार इन्टरमिडिएट एजुकेसन काउन्सिल, पटना’बाट जारी भएको देखाइएको आईए तहको नक्कली शैक्षिक प्रमाणपत्र पेस गरेको अख्तियारले जनाएको छ ।
अनुसन्धानबाट यादवले साविक भ्रष्टाचार निवारण ऐन, २०१७ को दफा १२ तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर गरेको पुष्टि भएको आयोगको भनाइ छ ।
आयोगले यादवलाई साविक भ्रष्टाचार निवारण ऐन, २०१७ को दफा १२ र दफा २९ को उपदफा (२) तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिम कैद तथा जरिवाना सजायको मागदाबी गर्दै बिहीबार विशेष अदालतमा आरोपपत्र दायर गरेको जनाएको छ ।
