सस्तो दरमा अमेरिकी डलर साट्ने प्रलोभन देखाएर ठगीको शृंखला चलाउँदै आएका सुजन तामाङलाई प्रहरीले गोली हानेर पक्राउ गरेको छ । पक्राउ गर्ने क्रममा प्रहरीमाथि नै चक्कु प्रहार गरेपछि प्रहरीले एक राउन्ड हवाई फायर र एक राउन्ड घुँडामुनि गोली प्रहार गरी उनलाई नियन्त्रणमा लिएको हो ।
जिल्ला प्रहरी परिसर काठमाडौंका प्रहरी वरिष्ठ उपरीक्षक (एसएसपी) दिलीप घिमिरेका अनुसार सिन्धुपाल्चोकको बाह्रबिसे नगरपालिका–३ घर भई काठमाडौं बस्दै आएका २८ वर्षीय तामाङलाई बिहीबार साँझ गोकर्णेश्वर नगरपालिका–३ स्थित गाम्चाबाट पक्राउ गरिएको हो ।
जिल्ला प्रहरी परिसर काठमाडौं र प्रहरी वृत्त बौद्धको टोली उनलाई पक्राउ गर्न पुगेका बेला तामाङले प्रहरीमाथि चक्कु प्रहार गरेका थिए । चक्कु प्रहारबाट एक प्रहरी घाइते भएका छन् । घाइते प्रहरीको राष्ट्रिय ट्रमा सेन्टरमा उपचार भइरहेको एसएसपी घिमिरेले जानकारी दिए ।
प्रहरीका अनुसार तामाङले अमेरिकी डलर सस्तो दरमा साटिदिने भन्दै कागजको बिटोलाई डलरको पोको बनाएर देखाउँदै सर्वसाधारणलाई ठगी गर्दै आएका थिए । पछिल्लो पटक २२ असोज २०८३ मा विभिन्न व्यक्तिलाई फोन गरी आफूसँग अमेरिकी डलर रहेको र सस्तो मूल्यमा साटिदिने भन्दै उनले ठगीको योजना बनाएको प्रहरीको भनाइ छ ।
प्रहरीका अनुसार उनले अमेरिकी डलर ५० को नोट साट्ने प्रलोभन देखाएर दुई जनालाई विश्वासमा पारेका थिए । त्यसपछि २३ असोज २०८३ मा गोकर्णेश्वरस्थित लसुनटारमा बोलाएर दुवै जनाबाट जनही ८ लाख रुपैयाँका दरले कुल १६ लाख रुपैयाँ लुटेर फरार भएका थिए ।
८ वटा ठगी मुद्दामा संलग्न रहेको प्रहरीको दाबी
प्रहरीको क्रिमिनल रेकर्ड सिस्टम (सीआरएस) जाँच गर्दा तामाङविरुद्ध यसअघि नै विभिन्न प्रहरी कार्यालयमा आठवटा ठगीसम्बन्धी मुद्दा दर्ता भएको पाइएको छ ।
प्रहरीका अनुसार उनीविरुद्ध १५ मंसिर २०८० मा प्रहरी वृत्त स्वयम्भूबाट पहिलो ठगी मुद्दा चलेको थियो। त्यसपछि २३ फागुन २०८० मा स्वयम्भूबाटै अर्को मुद्दा दर्ता भएको थियो ।
त्यस्तै, ८ साउन २०८१ मा जिल्ला प्रहरी परिसर भक्तपुर, १ कात्तिक २०८१ मा प्रहरी वृत्त स्वयम्भू, १६ मंसिर २०८२ मा इलाका प्रहरी कार्यालय बाह्रबिसे, २८ मंसिर २०८२ मा प्रहरी वृत्त महाराजगञ्ज, १ पुस २०८२ मा प्रहरी वृत्त बौद्ध र ८ चैत २०८२ मा प्रहरी वृत्त सातदोबाटोबाट उनीविरुद्ध ठगीसम्बन्धी मुद्दा चलेको प्रहरीको अभिलेखमा देखिएको छ ।
होटल र पसलको विवरण संकलन गरेर बनाउँथे विश्वास
प्रहरीका अनुसार तामाङको ठगी गर्ने शैलीसमेत योजनाबद्ध र फरक प्रकृतिको देखिएको छ । उनको मोबाइल फोन जाँच गर्दा विभिन्न होटल, रेस्टुरेन्ट, गरगहना पसल, हार्डवेयर, मेडिकल तथा होलसेल पसलका तस्बिर र फोन नम्बरहरू फेला परेका छन् ।
उनले यस्ता पसल तथा होटलमा पुगेर त्यहाँ टाँसिएका होर्डिङ बोर्ड र विज्ञापनमा उल्लेख भएका फोन नम्बरको तस्बिर खिचेर राख्ने गरेको प्रहरीको भनाइ छ । पछि सम्बन्धित व्यक्तिलाई फोन गरेर आफू पहिले त्यही होटलमा बसेको वा पसलबाट सामान खरिद गरेको बताउँदै विश्वासमा पार्ने गर्थे ।
यसरी परिचय र विश्वास स्थापित गरेपछि उनीहरूले सस्तो दरमा अमेरिकी डलर साटिदिने प्रस्ताव राख्ने र एकान्त स्थानमा बोलाएर ठगी तथा लुटपाट गर्ने गरेको प्रहरीको दाबी छ।
बोल्न नसक्ने व्यक्तिको नाटक गराएर ठगी
तामाङले ठगीका क्रममा आफ्नै समूहका एक सदस्यलाई बोल्न नसक्ने व्यक्तिको अभिनय गर्न लगाउने गरेकोसमेत प्रहरी अनुसन्धानबाट खुलेको छ ।
प्रहरीका अनुसार समूहका ती सदस्यलाई डलरको पोको बोक्न लगाएर कारोबारमा सहभागी गराइन्थ्यो । बाहिरपट्टि अमेरिकी डलरको नोट र भित्र कागजका बिटा राखिएको पोको देखाएर पीडितलाई विश्वास दिलाउने गरिन्थ्यो। पीडितले रकम दिएपछि उनीहरू पोको थमाएर फरार हुने गरेको प्रहरीको भनाइ छ ।
ठगी गरेपछि तामाङ मोटरसाइकलमा फरार हुने, त्यसपछि मोटरसाइकलको नम्बर प्लेट परिवर्तन गर्ने र सिमकार्डसमेत फेर्ने गरेको प्रहरीले जनाएको छ ।
नक्कली सुन देखाएर ठगी गरेको आशंका
प्रहरीका अनुसार पछिल्लो समय तामाङ स्वयम्भू, बुढानीलकण्ठ र साँखु क्षेत्रमा सुन भन्दै नक्कली सुन देखाएर ठगी गर्ने कार्यमा समेत सक्रिय रहेको खुलेको छ । विगतका अन्य घटनामा समेत उनको हुलियासँग मिल्दोजुल्दो व्यक्ति देखिएकाले उनी थप घटनामा पनि संलग्न हुन सक्ने प्रहरीको आशंका छ ।
आठवटा ठगीसम्बन्धी मुद्दाको अभिलेख रहेका तामाङ पक्राउ परेसँगै प्रहरीले उनीसँग जोडिएका अन्य घटनाबारे समेत अनुसन्धान अघि बढाएको जनाएको छ ।
