पर्साको पटेर्वासुगौली गाउँपालिकाका विभिन्न कच्ची सडकमा जमेको पानी प्रहरीले हटाएर सर्वसाधारणको सुरक्षित तथा सहज आवागमनका लागि सहजीकरण गरेको छ ।
इलाका प्रहरी कार्यालय पटेर्वासुगौलीका प्रहरी निरीक्षक समुन्नत अधिकारीको नेतृत्वमा खटिएको प्रहरी टोलीले गाउँपालिका–४ लगायतका विभिन्न स्थानमा रहेका कच्ची सडकका खाल्डाखुल्डीमा जमेको पानी हटाएको हो ।
लगातारको वर्षाका कारण सडकका खाल्डाखुल्डीमा पानी जम्दा पैदलयात्री तथा सवारीसाधनलाई आवतजावतमा समस्या हुनुका साथै दुर्घटनाको जोखिमसमेत बढेको थियो । उक्त अवस्थालाई मध्यनजर गर्दै प्रहरीले स्थानीयस्तरमा उपलब्ध साधनस्रोतको प्रयोग गरी पानीको निकास खोल्दै सडकमा आवागमन सहज बनाएको जनाएको छ ।
प्रहरीको पहलपछि स्थानीयवासी तथा यात्रुलाई सडकमा आवतजावत गर्न सहज भएको छ । प्रहरीले सार्वजनिक सुरक्षासँगै विपद् तथा वर्षाजन्य समस्याका समयमा नागरिकलाई आवश्यक सहयोग र सहजीकरण गर्दै आएको जनाएको छ ।
स्थानीयवासीले भने सडकमा पानी जम्ने समस्या दीर्घकालीन रूपमा समाधान गर्न सम्बन्धित निकायले उचित पानी निकासको व्यवस्था गर्नुपर्ने आवश्यकता औंल्याएका छन् ।
