प्रतिनिधिसभा निर्वाचनमा तेस्रो दलमा खुम्चिएपछि नेकपा एमाले आगामी स्थानीय तहको निर्वाचनमा पार्टी अध्यक्ष केपी शर्मा ओलीकै नेतृत्वमा सहभागी हुने योजनासहित तयारीमा जुटेको छ ।
२०८२ फागुन २१ गतेको प्रतिनिधिसभा निर्वाचनमा तेस्रो दलमा खुम्चिएपछि धक्का बेहोरेको एमालेले विगतका आन्तरिक विवाद र संगठनात्मक कमजोरी सुधार गर्दै आगामी निर्वाचनको नतिजा आफ्नो पक्षमा पार्ने रणनीतिसहित अघि बढेको छ । २०७९ को स्थानीय तह निर्वाचनमा ७५३ पालिकामध्ये २०७ पालिकाको प्रमुख जितेको एमालेले आगामी निर्वाचनमा आफ्नो अवस्था सुधार गर्ने लक्ष्य राखेको छ ।
एमाले प्रचार तथा प्रकाशन विभाग प्रमुख निरज आचार्यका अनुसार दसैँ–तिहारजस्ता ठूला चाडपर्वलगत्तै पार्टीले आफ्ना गतिविधि तीव्र पार्दै जनतामाझ पुग्नेछ । पार्टीभित्र एकता कायम राख्ने, जनतासँग बिग्रिएको सम्बन्ध सुधार गर्ने र वडास्तरीय अधिवेशनमार्फत युवालाई पार्टी कमिटीमा जोड्ने एमालेको रणनीति रहेको उनले बताए। युवाहरूलाई संगठनमा अवसर दिँदै उनीहरूकै सुझाव र सिफारिसका आधारमा स्थानीय निर्वाचनका उम्मेदवार चयन गर्ने तयारीसमेत पार्टीले गरेको छ ।
आचार्यका अनुसार असोज ५ देखि ८ गतेसम्म सम्पन्न केन्द्रीय कमिटी बैठकले संविधान र लोकतान्त्रिक प्रणालीको रक्षा तथा आगामी निर्वाचनको तयारीलाई प्रमुख कार्यभारका रूपमा अघि सारेको थियो । एमालेले प्रतिपक्षमा रहेर सरकारको विरोधमा मात्रै सीमित नभई पार्टी पुनर्निर्माण गर्ने, जनतामाझ नयाँ भरोसा स्थापित गर्ने र लोकतान्त्रिक प्रणालीलाई स्थिर दिशामा अघि बढाउने लक्ष्य लिएको जनाएको छ । निर्वाचनमा पराजयपछि अध्यक्ष ओलीको राजीनामा र नेतृत्व पुनर्गठनको माग उठे पनि पार्टी संस्थापन पक्षले तत्काल नेतृत्व परिवर्तनको बहसलाई प्राथमिकतामा नराखी संगठन सुदृढीकरणमा जोड दिएको छ ।
एमाले सचिव महेश बस्नेतका अनुसार बदलिँदो जनमत र युवाको राजनीतिक मनोविज्ञानलाई सम्बोधन नगरी निर्वाचनमा सफलता हासिल गर्न कठिन हुने निष्कर्षसहित पार्टीले संगठनलाई चलायमान र युवामैत्री बनाउने नीति अघि सारेको छ । पार्टीभित्र एकताको सन्देश दिन स्थायी कमिटी गठन र केन्द्रीय कमिटीमा मनोनयनलगायत सांगठनिक काम गरिएको छ । त्यस्तै, विद्या भण्डारीलाई वरिष्ठ नेताको जिम्मेवारी दिइएको छ भने अध्यक्ष ओलीसँग प्रतिस्पर्धा गरेका ईश्वर पोखरेललाई पनि स्थायी कमिटीमा समेटिएको विवरणमा उल्लेख छ ।
एमाले सचिव भानुभक्त ढकालका अनुसार मंसिर र पुसमा वडा तथा गाउँपालिका तहका अधिवेशन आयोजना गरेर नयाँ नेतृत्व चयन गर्ने तयारी भइरहेको छ । अधिवेशनबाट तल्लो तहका कार्यकर्ताले छनोट गरेको नेतृत्वका आधारमा पार्टीलाई थप व्यवस्थित बनाउने र जनसम्बन्ध विस्तार गर्ने योजना रहेको उनले बताए । अधिवेशनपछि पालिका तथा वडा प्रमुखहरू सहभागी हुने गरी प्रदेशस्तरीय भेला आयोजना गरेर चुनावी गतिविधिलाई तीव्र बनाउने एमालेको तयारी छ । निर्वाचनका क्रममा अध्यक्ष ओलीसहित पार्टीका शीर्ष नेताहरू पनि प्रचारप्रसारमा सक्रिय हुने ढकालले बताएका छन् ।
आगामी स्थानीय तह निर्वाचनमा एमालेले विगतका कमजोरीप्रति आत्मालोचना गर्ने, बदलिएको राजनीतिक परिस्थितिबारे जनतालाई जानकारी गराउने र जनतासँगको सम्बन्ध पुनःस्थापित गर्ने जनाएको छ । आन्तरिक एकता, गुटबन्दीको अन्त्य, युवा नेतृत्वलाई अवसर र संगठनात्मक सुधारलाई प्राथमिकतामा राख्दै एमालेले आगामी निर्वाचनमा आफ्नो नतिजा सुधार गर्ने लक्ष्य लिएको छ ।
भिडियाे रिपाेर्ट
