कञ्चनपुरको बेलौरीमा १६ वर्षीय किशोरलाई जबर्जस्ती जंगलमा लगेर कुटपिट गर्नुका साथै खुकुरी देखाएर ज्यान मार्ने धम्की दिएको आरोपमा पाँच जना पक्राउ परेका छन् । घटनामा संलग्न रहेको आरोप लागेका एक जना भने फरार रहेको प्रहरीले जनाएको छ ।
जिल्ला प्रहरी कार्यालय कञ्चनपुरका अनुसार बेलौरी नगरपालिका–९, रतनपुरका किशोरलाई असोज २३ गते दिउँसो करिब ४ बजे ‘एकछिन काम छ’ भन्दै केही किशोरले जबर्जस्ती स्कुटरमा राखेर खजुवा जंगल लगेका थिए ।
प्रहरीका अनुसार जंगलमा पुरानो रिसइबीका कारण किशोरलाई बन्धक बनाएर कुटपिट गरिएको थियो। उनीहरूले खुकुरी देखाउँदै ज्यान मार्ने धम्कीससमेत दिएको आरोप छ। घटनासम्बन्धी भिडियोसमेत सार्वजनिक भएको छ ।
पीडित किशोरकी आमा जानकी अवस्थीले घटनाबारे इलाका प्रहरी कार्यालय बेलडाँडीमा मौखिक जानकारी गराएपछि प्रहरी टोली घटनास्थलमा पुगेको थियो ।
घटनामा संलग्न रहेको आरोपमा प्रहरीले बेलौरी नगरपालिका–९, रतनपुरका २१ वर्षीय आशिष विष्ट, १९ वर्षीय दिलिप भट्ट, २१ वर्षीय शंकर सुनार, २३ वर्षीय सुजित अधिकारी र २२ वर्षीय मिलन तिरुवालाई पक्राउ गरेको छ। घटनामा संलग्न रहेको आरोप लागेका २४ वर्षीय लक्ष्मण भण्डारी भने फरार रहेको प्रहरीले जनाएको छ ।
प्रहरीले घटनामा प्रयोग भएको स्कुटर र खुकुरीसमेत नियन्त्रणमा लिएको छ। पक्राउ परेका पाँचै जनाविरुद्ध अपहरण, शरीर बन्धक, ज्यान मार्ने उद्योग तथा अपमानजनक अमानवीय व्यवहारसम्बन्धी कसुरमा अनुसन्धान भइरहेको जिल्ला प्रहरी कार्यालय कञ्चनपुरले जनाएको छ ।
प्रहरीका अनुसार पक्राउ परेका आरोपितमाथि अनुसन्धान गर्न अदालतबाट १४ दिनको म्याद थप गरिएको छ ।
