पर्सामा विद्यार्थी बेहोस हुन थालेपछि विद्यालय नजिकको घाट सार्ने र पूजापाठ गर्ने निर्णय गरेको छ ।
बुधबार विद्यालयका शिक्षक, अभिभावक र स्थानीय नेताहरूको बैठकले विद्यालयसँग टाँसिएको आर्यघाट अन्यत्र स्थानान्तरण गर्ने, मनोवैज्ञानिक परामर्श दिने र शान्ति स्थापनाका लागि पूजा-पाठ गर्ने निर्णय गरेको छ ।
कालिकामाई गाउँपालिका-४ स्थित नेपाल राष्ट्रिय माध्यमिक विद्यालयमा अध्ययनरत विद्यार्थीहरू अचानक बेहोस हुन थालेपछि अभिभावकहरू चिन्तित बनेका थिए । सोमबार दर्जनौँ विद्यार्थीहरु बेहोश हुनथालेपछि गाउँपालिका प्रशासनले दुई दिनका लागि विद्यालय बन्द गरेको थियो ।
चिकित्सकहरूले यो घटनालाई ‘मास हेस्टेरिया’ भनेका छन्, जुन मानसिक प्रभावका कारण समूहमा देखिने एक प्रकारको सामूहिक मनोवैज्ञानिक अवस्था हो । तर, केही स्थानीयले भने भूत(प्रेतको प्रभावका कारण यस्तो घटना भएको बताउने गरेको छ । सोहि कारण विद्यालय नजिकको घाट सार्ने र पुजापाठ गर्ने निर्णय गरिएको कालिकामाई गाऊँपालिकाका वडा नं. ४ का वडा अध्यक्ष संजय साहले बताए ।
उनका अनुसार विद्यालय प्रशासनले विद्यार्थीहरूलाई पुनः कक्षा सञ्चालन गर्नुअघि परामर्श दिने तयारी गरिरहेको जनाएको छ ।
