२०औँ एसियन गेम्समा पदक जित्न सफल नेपाली खेलाडी, प्रशिक्षक तथा व्यवस्थापकले सरकारबाट पुरस्कार रकम प्राप्त गरेका छन् ।
सरकारले खेलकुद विकास नियमावलीअनुसार नेपालका लागि कांस्यपदक जित्न सफल कराते खेलाडी तेञ्जिङ शर्मा र महिला कबड्डी टोलीका खेलाडीसहित प्रशिक्षक तथा व्यवस्थापकको बैंक खातामा पुरस्कार रकम जम्मा गरिदिएको हो । यसअघि असोज २३ गते बसेको मन्त्रिपरिषद् बैठकले पदक विजेता खेलाडी, प्रशिक्षक तथा व्यवस्थापकलाई पुरस्कार दिने निर्णय गरेको थियो ।
निर्णयअनुसार कराते खेलाडी तेञ्जिङ शर्माले ६ लाख ५० हजार रुपैयाँ पुरस्कार पाएका छन् । उनका प्रशिक्षक कुशल श्रेष्ठले एक लाख ३० हजार रुपैयाँ र व्यवस्थापक युवराज लामाले ६५ हजार रुपैयाँ प्राप्त गरेका छन् । त्यसैगरी, महिला कबड्डी टोलीका प्रत्येक खेलाडीले जनही एक लाख ९५ हजार रुपैयाँ पुरस्कार पाएका छन्। टोलीकी मुख्य प्रशिक्षक पार्वती राईले एक लाख ३० हजार रुपैयाँ तथा सहायक प्रशिक्षक लोकबहादुर विष्ट र व्यवस्थापक शरद दर्शनाधारीले जनही ६५ हजार रुपैयाँ प्राप्त गरेका छन् ।
जापानको नायोगामा आयोजित २०औँ एसियन गेम्समा नेपालका तर्फबाट सहभागी कराते खेलाडी तेञ्जिङ शर्मा र महिला कबड्डी टोलीले कांस्यपदक जितेका थिए । अन्तर्राष्ट्रिय प्रतियोगितामा पदक जितेर नेपालको प्रतिष्ठा बढाउन योगदान पुर्याएका खेलाडी तथा प्रशिक्षकलाई सरकारले पुरस्कार प्रदान गरेको हो ।
