पर्साको जिराभवानी गाउँपालिका–२, सेढवास्थित मिनी रङ्गशालामा सञ्चालन भइरहेको प्रथम जिराभवानी भेट्रान्स गोल्डकप फुटबल प्रतियोगितामा हटिया भेट्रान्स हेटौँडा र हरिवन भेट्रान्सले जित हासिल गरेका छन् । प्रतियोगिताअन्तर्गत आज भएका दुई खेलमा हटिया भेट्रान्स हेटौँडाले एनजे जेभीसी सिमरा, बारालाई १–० गोलले पराजित गरेको छ भने हरिवन भेट्रान्सले डुमरवाना भेट्रान्सलाई ३–० गोलले हराएको छ ।
पहिलो खेलमा हटिया भेट्रान्स हेटौँडा र एनजे जेभीसी सिमरा, बाराबीच प्रतिस्पर्धा भएको थियो । २०–२० मिनेटको खेलमा हटिया भेट्रान्स हेटौँडाले १ गोल गर्दै जित आफ्नो पक्षमा पारेको हो। खेलमा हटिया भेट्रान्स हेटौँडाका जर्सी नम्बर १० का खेलाडी महेश लामा ‘म्यान अफ द म्याच’ घोषित भएका छन् ।
त्यसैगरी, प्रतियोगिताको दोस्रो खेलमा हरिवन भेट्रान्सले डुमरवाना भेट्रान्सलाई ३–० गोलले पराजित गरेको छ । खेलमा हरिवन भेट्रान्सले उत्कृष्ट प्रदर्शन गर्दै तीन गोलको अन्तरमा जित निकालेको हो। दोस्रो खेलमा हरिवन भेट्रान्सका जर्सी नम्बर ९ का खेलाडी सुबास घिमिरे ‘म्यान अफ द म्याच’ घोषित भएका छन् ।
जिराभवानी गाउँपालिका–२, सेढवास्थित मिनी रङ्गशालामा सञ्चालन भइरहेको प्रथम जिराभवानी भेट्रान्स गोल्डकपले भेट्रान्स खेलाडीलाई प्रतिस्पर्धात्मक फुटबल खेल्ने अवसर प्रदान गरेको छ । प्रतियोगितामार्फत स्थानीय क्षेत्रमा खेलकुद गतिविधि प्रवर्द्धन गर्नुका साथै फुटबलप्रति युवापुस्ता र खेलप्रेमीको आकर्षण बढाउने अपेक्षा गरिएको छ ।
प्रतियोगितामा सहभागी टोलीबीचको प्रतिस्पर्धाले मिनी रङ्गशालामा खेलकुदको माहोल थप उत्साहपूर्ण बनेको छ। विजयी टोलीहरूका खेलाडीले आफ्नो प्रदर्शनमार्फत प्रतियोगितामा अघि बढ्ने सम्भावना बलियो बनाएका छन् ।
