बाराको जीतपुरसिमरा उपमहानगरपालिका–२ स्थित जगदम्बा स्टील्स पछाडिको बस्तीमा टोकाहा कुकुरको आतंक बढेको छ ।
एक सातादेखि बस्तीमा आतंक मच्चाउँदै आएको कुकुरको आक्रमणबाट एक महिला र दुई बालकसहित तीन जना घाइते भएका छन् । सोमबार बिहान मन्दिरमा पूजा गर्न गएकी स्थानीय मन्दिरा रिजालमाथि कुकुरले आक्रमण गरेको थियो । आक्रमणबाट रिजालको मुखमा गम्भीर चोट लागेको छ भने ओठको भागमा समेत क्षति पुगेको छ । उनलाई तत्काल उपचारका लागि वीरगन्ज लगिएको र थप उपचारका लागि काठमाडौं पठाइएको वडाध्यक्ष धनबहादुर श्रेष्ठले जानकारी दिएका छन् ।
यसअघि उक्त कुकुरले केही दिनअघि सोही क्षेत्रकी तीन वर्षीया बालिका आयंका तामाङलाई टोकेको थियो। कुकुरको आक्रमणबाट बालिकाको मुख र चिउँडोमा गम्भीर चोट लागेको थियो। उनलाई उपचारका लागि काठमाडौं लगिएको र प्रारम्भिक उपचारपछि घर ल्याइएको जनाइएको छ। बालिकाको थप उपचारका लागि करिब तीन लाख रुपैयाँ खर्च लाग्ने अनुमान गरिएको छ।
पूर्वजनप्रतिनिधि शोभा कार्कीका अनुसार उपचारमा लाग्ने खर्च जुटाउन नसक्दा बालिकाको परिवार समस्यामा परेको छ। उपचारका लागि ठूलो रकम आवश्यक पर्ने भएपछि परिवार आर्थिक संकटमा परेको कार्कीले बताएकी छन्।
कार्कीका अनुसार उक्त कुकुरले अर्का एक बालकको पाखुरामा समेत टोकेर घाइते बनाएको छ। ती बालकको पहिचान भने खुल्न सकेको छैन।
एक सातादेखि बस्तीमा त्रास फैलाइरहेको कुकुरको खोजी गर्दा पनि फेला पार्न नसकिएको स्थानीयले बताएका छन्। कुकुरको आक्रमणबाट एकपछि अर्को व्यक्ति घाइते हुन थालेपछि स्थानीय युवाहरू कुकुरको खोजीमा जुटेका छन्।
यसैबीच, जीतपुरसिमरा उपमहानगरपालिकाका नगर प्रमुख राजन पौडेलले सर्वसाधारणलाई उच्च सतर्कता अपनाउन र सचेत रहन आग्रह गरेका छन्। उनले उक्त कुकुर देखेमा तत्काल सम्बन्धित निकायलाई सूचना दिनसमेत अनुरोध गरेका छन्।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
