प्रसौनी—३ बारा की शाहबुन खातुनले श्रीमानको उपचारका लागि सहयोगको अपिल गरेकी छिन् । आर्थिक अवस्था कमजोर रहेका कारण ३२ वर्षीय नोस्तहिम मियाको उपचारमा कठिनाइ भईरहेको उनले सहयोगी मनको अपेक्षा गरेकी छन्
पत्थरीको समस्या देखिएपछि भारतको खैरवामा शल्यक्रिया गराए पनि मियाको स्वास्थ्यमा सुधार आउन सकेन । शल्यक्रिया पछि मिर्गौलामा समेत समस्या देखिएपछि उनलाई वीरगंजको नारायणी अस्पताल र तराई अस्पतालमा उपचार गराइएको थियो । त्यहाँ पनी कुनै सुधार नआएपछि चितवनको भरतपुर अस्पतालमा थप उपचार गराउन लगिएको थियो ।
भरतपुर क्यान्सर अस्पतालमा चेकअप गराएपछि चिकित्सकहरूले मियाको किड्नी र लिभरमा गम्भीर समस्या रहेको बताएको खातुनले बताईन् । हालसम्मको उपचारमा सम्पूर्ण रकम खर्च भइसकेको र थप उपचारका लागि आवश्यक रकम अभाव भएकाले उनी घर फर्किन बाध्य भइन् । चिकित्सकहरूका अनुसार मियाको उपचारका लागि करिब ६ लाख रुपैयाँ आवश्यक पर्ने भएको छ ।
मिया पेशाले ड्राइभर हुन, उनि चिम्नीमा गाडी चलाउने गर्छन तर, बिरामी परेर सबै पैसा सकिएपछि अहिले औषधि किन्ने समेत पैसा नभएको खातुनले बताइन् । घरमा कुनै आम्दानीको स्रोत नरहेकाले दैनिक गुजाराका लागि समेत समस्या भइरहेको उनी बताउँछिन् । छरछिमेकीले सहयोग स्वरूप थोरै(थोरै अन्न दिएर गुजारा चलिरहेको उनले बताइन् । मियाको चार सन्तान छन्— दुई छोरा र दुई छोरी ।
प्रसौनी गाउँपालिका वडा नम्बर ३ का वडा अध्यक्षका प्रत्याशी रामप्रसाद साहले मियाको आर्थिक अवस्था अत्यन्तै कमजोर रहेको बताए । नेपाली कांग्रेस बारा क्षेत्र नं ४ का सभापति सुनिल प्रसाद गुप्ताले शनिबार उनलाई काठमाडौं मेडिकल कलेज, सिनामंगल पठाउने व्यवस्था गरिएको जानकारी दिए ।
गुप्ताले समाजसेवी, संघसंस्था तथा राजनीतिक दलहरूसँग सहकार्य गरी मियाको उपचारका लागि सहयोग गर्न आग्रह गरेका छन् ।
