सप्तरीको बलानबिहुल गाउँपालिका–६ स्थित धर्मराज बाबा धान–गहुँ खरिदबिक्री केन्द्रबाट करिब तीन सय बोरा गहुँ चोरी भएको छ । चारैतिरबाट करिब २० फिट पर्खालले घेरिएको गोदामबाट आइतबार राति ताल्चा फुटाएर ठुलो परिमाणमा गहुँ चोरी भएपछि प्रहरीले घटनाको अनुसन्धान सुरु गरेको हो ।
केन्द्रका सञ्चालक गङ्गाराम महरानका अनुसार गोदाममा भण्डारण गरिएका ६३५ बोरा गहुँमध्ये करिब तीन सय बोरा चोरी भएको हो । केन्द्रपरिसरमा राखिएको ट्याक्टरको ब्याट्रीसमेत चोरी भएको उहाँले जानकारी दिनुभयो ।
घरमा गोसाइँ (कुलदेउता) पूजा रहेकाले आइतबार साँझ नै केन्द्र बन्द गरेर गएको र सोमबार बिहान करिब ६ बजे गोदाममा पुग्दा चोरी भएको थाहा पाएको सञ्चालक महरानले बताउनुभयो । बिहान गोदामको ढोका खुला रहेको र लगाएर गएको ताल्चा फुटाएर नजिकै फालिएको अवस्थामा भेटिएपछि प्रहरीलाई खबर गरेको उहाँले जानकारी दिनुभयो । रातिको समयमा गोदाममा कोही नभएको र गाउँका अधिकांश व्यक्ति गोसाइँपूजामा व्यस्त रहेको मौका छोपेर चोरी भएको हुन सक्ने उहाँको आशङ्का छ ।
वडाध्यक्ष सूर्यप्रसाद दासले ठुलो परिमाणमा गहुँ लगिएको घटनालाई सामान्य चोरीभन्दा गम्भीर रूपमा लिनुपर्ने बताउनुभयो । उहाँले गाउँपालिकामा सिसी क्यामरा जडानका लागि लाखौँ रुपियाँ खर्च भएको भनिए पनि समयमै क्यामरा जडान तथा सञ्चालन गर्न नसक्दा घटनामा संलग्न व्यक्तिको पहिचान गर्न समस्या हुन सक्ने बताउनुभयो ।
जिल्ला प्रहरी कार्यालय सप्तरीका प्रहरी उपरीक्षक रूपक खड्काले घटनाबारे अनुसन्धान भइरहेको जानकारी दिनुभयो । उहाँका अनुसार सुरुमा सञ्चालक महरानले गोदामबाट १५० बोरा गहुँ र ट्याक्टरको एउटा ब्याट्री चोरी भएको जानकारी प्रहरीलाई गराउनुभएको थियो । पछि भने करिब तीन सय बोरा गहुँ चोरी भएको बताएको उहाँले जानकारी दिनुभयो । प्रहरी उपरीक्षक खड्काका अनुसार सञ्चालकले प्रतिबोरा ६० केजीका दरले गहुँ रहेको बताएका छन् । घटनाबारे इलाका प्रहरी कार्यालय कडरबोनाले थप अनुसन्धान गरिरहेको उहाँले बताउनुभयो ।
