नेपालबाट भारततर्फ तस्करी गरी लैजाँदै गरिएका १० वटा गाईगोरु भारतीय सीमा सुरक्षा बल (एसएसबी) र स्थानीय प्रहरीले संयुक्त रूपमा बरामद गरेका छन् ।
भारतको बिहारस्थित मोतिहारीमा तैनाथ एसएसबीको ७१औँ बटालियनअन्तर्गत ई–कम्पनी बेलदरवामठ र आदापुर प्रहरीले बिहीबार बिहान करिब २:१५ बजे संयुक्त गस्तीका क्रममा ती चौपाया बरामद गरेका हुन् ।
प्राप्त सूचनाका आधारमा सीमा क्षेत्रमा निगरानी गर्ने क्रममा भारतको इनर्वा (लरहाटोला) गाउँनजिकै नेपाल–भारत सीमा स्तम्भ नम्बर ३८४–१८ बाट भारतीय भूमितर्फ करिब ५० मिटरको दूरीमा गाईगोरु फेला परेको एसएसबीले जनाएको छ ।
बरामद गरिएका चौपायामा तीन वटा गाई, चार वटा बाच्छा र तीन वटा बाच्छी रहेका छन् । प्रारम्भिक विवरणअनुसार ती चौपाया नेपालको नीलकण्ठ क्षेत्रबाट भारतको सिरसिया कलातर्फ तस्करी गरी लैजाँदै गरिएको थियो ।
रातको अँध्यारोको फाइदा उठाउँदै तस्करीमा संलग्न व्यक्तिहरू भने नेपालतर्फ भाग्न सफल भएका थिए। बरामद गरिएका सबै चौपाया आवश्यक कानुनी कारबाहीका लागि आदापुर प्रहरी थानामा बुझाइएको एसएसबीले जनाएको छ ।
एसएसबीको ७१औँ बटालियन मुख्यालय पिपराकोठीका अनुसार सीमावर्ती क्षेत्रमा चौपाया तस्करी नियन्त्रण गर्न सूचनाका आधारमा निगरानी र संयुक्त गस्ती सञ्चालन गरिँदै आएको छ ।
