इमरान शेख, लोकेश बम र आन्द्रे रसेलको अर्धशतकको मद्दतमा विराटनगर किंग्सले नेपाल प्रिमियर लिग (एनपीएल) अन्तर्गत जनकपुर बोल्ट्सलाई १७५ रनको लक्ष्य दिएको छ ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ३ विकेट गुमाएर १७४ रन बनाएको हो ।
विराटनगरका लागि इमरान शेखले सर्वाधिक ५६ रन बनाए । उनले ४५ बलमा ५ चौका र २ छक्का प्रहार गरे । ओपनर लोकेश बमले ४० बलमा समान ३ चौका र ३ छक्काको मद्दतमा ५० रन जोडे ।
एनपीएल इतिहासमा एउटै खेलमा दुई नेपाली ब्याटरले अर्धशतक बनाएको यो पहिलो पटक हो ।
ओपनर शेहान जयासूर्य टिमको स्कोर २ रन हुँदा आउट भएपछि क्रिजमा आएका इमरान र लोकेशले दोस्रो विकेटका लागि १०७ रनको महत्त्वपूर्ण साझेदारी गरे । जारी सिजनको यो पहिलो शतकीय साझेदारीसमेत हो ।
यस्तै, आक्रामक ब्याटिङ गरेका आन्द्रे रसेलले अविजित ५२ रन बनाए । उनले २९ बलमा २ चौका र ५ छक्का प्रहार गरे । शुभम रन्जाने ७ रनमा अविजित रहे ।
बलिङतर्फ जनकपुर बोल्ट्सका अभिषेक तिवारीले २ तथा मोइन अलीले १ विकेट लिए ।
अब जनकपुर बोल्ट्सले जितका लागि १७५ रन बनाउनुपर्नेछ ।
