वीरगंज महानगरपालिका वडा नम्बर १५ अन्तर्गत भेडियाहीमा सञ्चालन भइरहेका दुईवटा बालुवा तथा गिट्टी क्रसर उद्योगलाई लिएर स्थानीयले वडाध्यक्ष रमेश यादवको कार्यशैलीप्रति असन्तुष्टि जनाएका छन् । स्थानीयले वातावरणीय अवस्थालाई बेवास्ता गर्दै क्रसर सञ्चालन भइरहेको र पटक–पटक जानकारी गराउँदा पनि वडाध्यक्षले चासो नदेखाएको आरोप लगाएका छन् ।
स्थानीयका अनुसार भेडियाहीमा सञ्चालित दुईवटा क्रसरका कारण वातावरणमा प्रतिकूल असर पर्न सक्ने भन्दै उनीहरूले पटक–पटक वडाध्यक्षलाई जानकारी गराउँदै आएका छन् । तर, समस्या समाधानका लागि आवश्यक पहल र अनुगमन नभएको उनीहरूको गुनासो छ ।
क्रसर सञ्चालनका कारण नजिकै रहेको मन्दिरमा नियमित पूजा–पाठ गर्नसमेत कठिनाइ भइरहेको र आसपासका चराचुरुङ्गी तथा वातावरणमा समेत असर परेको स्थानीयको भनाइ छ । वातावरणीय प्रभावलाई ध्यान नदिई क्रसर सञ्चालन भइरहेको अवस्थामा पनि वडाध्यक्षले कुनै चासो नदेखाएको भन्दै स्थानीयले असन्तुष्टि व्यक्त गरेका छन् ।
त्यस्तै, क्रसर उद्योग सञ्चालनका लागि आवश्यक कागजी प्रक्रिया तथा कानुनी मापदण्ड पूरा गरिएको छ वा छैन भन्ने विषयमा समेत स्थानीयले प्रश्न उठाएका छन् । सम्बन्धित निकायबाट आवश्यक कागजात, अनुमति तथा वातावरणीय मापदण्डको जाँच हुनुपर्ने उनीहरूको माग छ ।
स्थानीयका अनुसार वडाभित्र विकास निर्माणका कामसमेत समान रूपमा नभई पक्षपातपूर्ण ढंगले भइरहेको छ । जनताको समस्या सुन्ने र समाधानका लागि पहल गर्ने जिम्मेवारी पाएका वडाध्यक्ष नै पटक–पटकको गुनासोपछि पनि मौन बसेको भन्दै उनीहरूले असन्तुष्टि जनाएका छन् ।
यस विषयमा स्थानीयले वीरगंज महानगरपालिकाका मेयरको भूमिकामाथि समेत प्रश्न उठाएका छन् । वडाभित्र क्रसर सञ्चालन र त्यसबाट उत्पन्न समस्याबारे जानकारी हुँदाहुँदै पनि महानगरपालिकाले किन आवश्यक अनुगमन तथा कारबाही गर्न सकेको छैन भन्ने उनीहरूको प्रश्न छ ।
स्थानीयले सम्बन्धित निकायसँग भेडियाहीमा सञ्चालित दुवै क्रसरको तत्काल स्थलगत अनुगमन गर्न, सञ्चालनका लागि आवश्यक कानुनी अनुमति तथा कागजी प्रक्रिया पूरा भए–नभएको जाँच गर्न, वातावरणीय प्रभावको मूल्याङ्कन गर्न र नियमविपरीत सञ्चालन भएको पाइए कानुनअनुसार कारबाही गर्न माग गरेका छन् ।
