पर्सा जिल्ला अदालतले सेवाग्राहीलाई सहज, सरल र सुविधायुक्त वातावरणमा न्यायिक सेवा उपलब्ध गराउने उद्देश्यले संरचनागत तथा व्यवस्थापकीय सुधारका काम अघि बढाएको छ ।
न्यायिक सेवालाई थप प्रभावकारी, व्यवस्थित र सेवाग्राहीमैत्री बनाउने लक्ष्यसहित अदालतले भौतिक पूर्वाधार सुधार तथा संस्थागत विकासलाई प्राथमिकता दिएको हो ।
अदालतले सेवाग्राहीको सुविधालाई ध्यानमा राख्दै परिसरमा न्यायको मूर्ति स्थापना गरेको छ । त्यस्तै, महिला तथा पुरुष सेवाग्राहीका लागि छुट्टाछुट्टै शौचालय निर्माण गर्नुका साथै न्यायाधीशको च्याम्बरमा समेत शौचालयको व्यवस्था गरिएको छ । सेवाग्राही महिलाको सहजताका लागि स्तनपान कक्षसमेत स्थापना गरिएको अदालतले जनाएको छ ।
त्यसैगरी, अदालतमा जफत भएका दुईवटा सवारीसाधन कार्यालयकै नाममा दर्ता गराउने प्रक्रिया अघि बढाइएको छ । अदालतको भौतिक पूर्वाधार विस्तार तथा व्यवस्थापनका लागि थप ९ कट्ठा जग्गा प्राप्तिसम्बन्धी कामसमेत अगाडि बढाइएको छ ।
अदालत परिसरमा रहेको खाली स्थानको उपयोग गर्दै कम्प्युटर अपरेटर कक्षको व्यवस्था गरिएको छ भने सबै इजलासमा एसी जडान गरिएको छ । यसका अतिरिक्त अदालत भवनको रङ्गरोगन तथा सौन्दर्यीकरण गरी वातावरणलाई थप व्यवस्थित बनाइएको छ ।
रजिस्ट्रार तथा स्रेस्तेदार मल्लिकका अनुसार अदालतमा आउने सेवाग्राही, न्यायाधीश तथा कर्मचारीलाई सहज वातावरण उपलब्ध गराउनुका साथै न्यायिक सेवा प्रवाहलाई प्रभावकारी र व्यवस्थित बनाउने उद्देश्यले सुधारका कामलाई प्राथमिकता दिइएको हो ।
अदालतमा भइरहेका यी सुधारले न्यायिक सेवा लिन आउने सर्वसाधारणलाई सहजता प्रदान गर्नुका साथै अदालतको सेवा प्रवाहलाई थप सेवाग्राहीमैत्री बनाउने अपेक्षा गरिएको छ ।
यसैबीच, आर्थिक वर्ष २०८२/८३ को वार्षिक प्रगति विवरणअनुसार पर्सा जिल्ला अदालतले कुल मुद्दामध्ये ५७.६८ प्रतिशत मुद्दा फछ्र्योट गरेको छ ।
अदालतको विवरणअनुसार दुई वर्ष नाघेका विचाराधीन मुद्दाको संख्या २४० रहेको छ भने १८ महिना नाघेका मुद्दा ३३ वटा छन् । त्यस्तै, बालबालिकासम्बन्धी कुल ८२ मुद्दामध्ये ५४ वटा फछ्र्योट भएका छन् भने २८ वटा मुद्दा अझै बाँकी रहेका छन् ।
