वीरगंज महानगरपालिका वडा नं. १४ ठूलो पिपरास्थित मुखिया सडक विगत १० वर्षदेखि विवादमा पर्दै आएको छ ।
सडक विस्तारको आवश्यकता लामो समयदेखि महसुस गरिए पनि विवादका कारण सडक विस्तार हुन नसक्दा स्थानीयवासीले विभिन्न समस्या भोग्दै आएका छन् । गाउँमा राजनीतिक दलका ठूला नेतादेखि जनप्रतिनिधिसम्मको उपस्थिति रहे पनि आफ्नै गाउँको सडक समस्या समाधान हुन नसकेको भन्दै स्थानीयवासीले गुनासो गरेका छन् ।
स्थानीयवासीका अनुसार सडक विस्तार हुन नसक्दा गाउँको विकास प्रभावित भएको छ । कतिपय स्थानीय आफ्नो पुरानो घर छाडेर नयाँ बस्तीमा बसाइँ सर्न बाध्य भएका छन् भने केहीले पुरानै घरमा बस्दै आएका छन् । सडकको अवस्था र विस्तारसम्बन्धी अन्योलले स्थानीयको दैनिक जीवनसमेत प्रभावित बनेको उनीहरूको भनाइ छ ।
उक्त गाउँ नेपाली कांग्रेसका जिल्ला अध्यक्षसमेत रहेका नेता रामनरायण कुर्मीको गाउँ हो । त्यस्तै, विभिन्न राजनीतिक दल तथा समूहसँग आबद्ध नेता, कार्यकर्ता र जनप्रतिनिधिहरूको पनि गाउँमा उत्तिकै उपस्थिति छ। तर, यति धेरै राजनीतिक नेतृत्व र पहुँच भएका व्यक्तिहरू रहे पनि मुख्य सडकको विवाद समाधान हुन नसकेको भन्दै स्थानीयले प्रश्न उठाएका छन् ।
स्थानीयले सडक विस्तारसम्बन्धी लामो समयदेखिको विवाद समाधान गरी सडक निर्माण तथा विस्तारको काम अघि बढाउनुपर्ने माग गरेका छन् ।
महानगरपालिकाले आपसी समन्वय गरी ठूलो पिपराको मुखिया सडक समस्याको दीर्घकालीन समाधान खोज्ने कि भन्ने प्रश्न स्थानीयवासीले उठाउन थालेका छन् ।
