चितवन । सर्वोच्च अदालतले हात्तीलाई मनोरञ्जन र पर्यटनको साधन नभई संवेदनशील प्राणीका रूपमा मान्यता दिँदै आदेश जारी गरेपछि पशुअधिकारवादी संस्था पेटा (पिपुल फर द एथिकल ट्रिटमेन्ट अफ एनिमल्स) ले चितवन हात्ती महोत्सवमा आयोजना गरिने हात्तीका खेल बन्द गर्न माग गरेको छ ।
पेटाले महोत्सवमा हात्तीलाई प्रयोग गरेर खेल तथा मनोरञ्जनात्मक गतिविधि सञ्चालन नगर्न आयोजकसँग आग्रह गरेको छ । साथै, महोत्सवलाई प्रायोजन गर्दै आएका संघसंस्था तथा कम्पनीलाई समेत आफ्नो सहयोग फिर्ता लिन आह्वान गरेको छ ।
पेटाले जारी गरेको विज्ञप्तिअनुसार संस्थाको अभियानपछि यसअघि महोत्सवलाई सहयोग गर्दै आएका केही प्रायोजकले आफ्नो साथ छाडिसकेका छन् ।
पेटाले नेपालमा बन्दी बनाएर राखिएका हात्तीको अवस्था, उनीहरूमाथि हुने दुर्व्यवहार र अमानवीय व्यवहारविरुद्ध लामो समयदेखि आवाज उठाउँदै आएको जनाएको छ । चितवन हात्ती महोत्सवमा समेत माउतेहरूले लट्ठी तथा काठबाट बनाइएका धारिला हतियार प्रयोग गरी हात्तीमाथि प्रहार गर्ने गरेको भिडियो सार्वजनिक भएको संस्थाको दाबी छ ।
पेटाका अनुसार महोत्सवका क्रममा एक माउतेले एउटा हात्तीलाई ६४ पटकसम्म घोच्ने, लात्ती हान्ने र कुटपिट गरेका थिए । पर्यटकसँग तस्बिर खिचाउन प्रयोग गरिएका तथा पालो पर्खिरहेका हात्तीलाई समेत फलामे टुप्पो भएको अङ्कुश र धारिला हतियारले घोच्ने गरिएको भिडियोमा देखिएको संस्थाले जनाएको छ ।
पेटाका अध्यक्ष जेसन बेकरले सर्वोच्च अदालतको आदेशले हात्ती पर्यटनका सामग्री नभई संवेदनशील प्राणी भएको स्पष्ट पारेको बताएका छन् । उनले अदालतको आदेशसँगै चितवन हात्ती महोत्सवमा हुँदै आएका पुराना तथा क्रूर हात्तीका खेल अन्त्य हुनुपर्नेमा जोड दिएका छन् ।
पेटाले नेपाल पर्यटन बोर्ड तथा राष्ट्रिय निकुञ्ज तथा वन्यजन्तु संरक्षण विभागलाई समेत महोत्सवमा हात्तीको प्रयोग रोक्न आवश्यक कदम चाल्न आग्रह गरेको छ ।
प्रकृतिमा हात्ती मातृप्रधान समूहमा बस्ने, एकअर्काको संरक्षण गर्ने र समूहका बच्चाको हेरचाहमा सामूहिक भूमिका निर्वाह गर्ने सामाजिक प्राणी भएको पेटाले उल्लेख गरेको छ ।
तर, बन्दी अवस्थामा राखिएका हात्तीलाई प्राकृतिक वातावरण र आवश्यक गतिविधिबाट वञ्चित गरिने तथा उनीहरूमा गम्भीर मानसिक तनावका लक्षण देखिने संस्थाको भनाइ छ ।
पेटाले हात्तीलाई मनोरञ्जनको साधनका रूपमा प्रयोग गर्नुको सट्टा उनीहरूको प्राकृतिक व्यवहार, स्वतन्त्रता र कल्याणलाई प्राथमिकता दिनुपर्ने माग गर्दै आएको छ ।
