बारा । बिरामीको चाप बढ्दै गएपछि बाराको जीतपुरसिमरा उपमहानगरपालिकाले नगर अस्पतालको सेवा नयाँ भवनबाट सुरु गरेको छ । जीर्ण तथा साँघुरो पुरानो भवनबाट स्वास्थ्य सेवा प्रवाह गर्न कठिनाइ भएपछि उपमहानगरले कात्तिक दोस्रो सातादेखि चारतले नयाँ भवनबाट विशेषज्ञ चिकित्सकसहितको सेवा सञ्चालनमा ल्याएको हो ।
नयाँ भवनबाट सेवा सुरु भएसँगै अस्पतालमा बिरामीको चाप व्यवस्थापन गर्न र सेवाग्राहीलाई सहज रूपमा स्वास्थ्य सेवा उपलब्ध गराउन सजिलो भएको बालरोग विशेषज्ञ डा. इस्लामुदिन अन्सारीले जानकारी दिए ।
हाल नगर अस्पतालमा दैनिक ३५० देखि ४०० जनासम्म बिरामी उपचारका लागि आउने गरेका छन् । यसअघि दैनिक १५० देखि २०० जनासम्म बिरामी आउने गरेकोमा नयाँ भवन र विशेषज्ञ सेवाको विस्तारसँगै बिरामीको संख्या बढेको अस्पताल प्रमुख डा. रौनियारले बताए ।
उनका अनुसार बालरोग उपचारका लागि वीरगंज, हेटौँडा र भरतपुर पुग्नुपर्ने अभिभावकहरू अहिले नगर अस्पतालमै आउन थालेका छन्। अस्पतालमा दैनिक ७० देखि ९० जनासम्म बालबालिका उपचारका लागि आउने गरेका छन् ।
‘राम्रो सुविधा पाउन थालेपछि हेटौँडा, वीरगंज र भरतपुर धाउने अभिभावकहरू अहिले नगर अस्पताल आउनुहुन्छ,’ डा. अन्सारीले भने, ‘हामीकहाँ बालबालिकाको सबैखाले स्वास्थ्य परीक्षणदेखि भर्ना गरेर उपचार गर्नेसम्मको सुविधा छ ।’
पुरानो भवनमा सेवा प्रवाह गर्दा निकै समस्या हुने गरेको उल्लेख गर्दै उनले नयाँ भवनमा बालबालिकाका लागि छुट्टै व्यवस्थित वार्डको व्यवस्था गरिएको बताए।
५० वर्ष पुरानो इतिहास बोकेको सिमरा स्वास्थ्य चौकी तथा प्राथमिक स्वास्थ्य केन्द्रलाई स्तरोन्नति गर्दै उपमहानगरपालिकाले २०७९ सालमा नगर अस्पताल घोषणा गरेको थियो। नगरप्रमुख राजन पौडेलले शिक्षा र स्वास्थ्यलाई प्राथमिकतामा राख्दै आफ्नो कार्यकालमा अस्पतालको नयाँ भवन निर्माण गरी सञ्चालनमा ल्याएका हुन् ।
संघीय सरकार र उपमहानगरपालिकाको साझेदारीमा करिब १७ करोड रुपैयाँको लागतमा २५ शय्याको अस्पताल भवन निर्माण गरिएको हो ।
नगर अस्पतालमा बहिरङ्ग सेवा (ओपीडी), हाडजोर्नी विशेषज्ञ, बालरोग विशेषज्ञ, फिजियोथेरापी, आधुनिक एनालाइजर प्रविधिसहितको प्रयोगशाला र फार्मेसी सेवा सञ्चालनमा छन् ।
अस्पताल प्रमुख डा. रौनियारका अनुसार विशेषज्ञ चिकित्सक थपिए पनि पुरानो भवनमा उनीहरूका लागि बस्ने कोठासमेत थिएन। भवनले बिरामी तथा स्वास्थ्य सेवाको चाप धान्न नसक्ने अवस्था भएपछि नयाँ भवनमा सर्नुपरेको उनले बताए ।
‘पहिला दैनिक १५० देखि २०० जना बिरामी आउँथे भने अहिले ४०० जनासम्मलाई सेवा दिइरहेका छौँ,’ उनले भने ।
नयाँ भवनमा तत्कालका लागि ओपीडी र प्रयोगशाला सेवा सुरु गरिएको छ भने अन्य सेवाहरू चरणबद्ध रूपमा सञ्चालन गरिने अस्पतालले जनाएको छ ।
हाल अस्पतालमा पाँच जना विशेषज्ञ चिकित्सक, ११ जना मेडिकल अधिकृतसहित स्वास्थ्यकर्मी तथा कर्मचारी गरी ५५ जना कार्यरत छन् । अस्पतालले एक वर्षदेखि हाड तथा जोर्नीसम्बन्धी शल्यक्रिया सेवा पनि प्रदान गर्दै आएको छ ।
अस्पतालमै विशेषज्ञ चिकित्सकबाट शल्यक्रियासमेत हुन थालेपछि स्थानीय नागरिकलाई उपचारका लागि वीरगञ्ज, भरतपुर र काठमाडौँ धाउनुपर्ने बाध्यता कम हुँदै गएको डा. रौनियारको भनाइ छ।
यसैबीच, उपमहानगरपालिकाको स्वास्थ्य शाखा प्रमुख रविकुमार भास्करले नवनियुक्त स्वास्थ्यकर्मीलाई अस्पतालका कमीकमजोरी पहिचान गरी सेवा सुधारमा सक्रिय हुन आग्रह गरेका छन्। उनले अस्पतालको सेवा प्रभावकारी बनाउन आवश्यक सुझाव दिन तथा बिरामीलाई गुणस्तरीय स्वास्थ्य सेवा उपलब्ध गराउन स्वास्थ्यकर्मीलाई अनुरोध गरेका छन्।
नयाँ भवनबाट सेवा सुरु भएसँगै जीतपुरसिमरा नगर अस्पताललाई स्थानीयस्तरमै भरपर्दो स्वास्थ्य सेवाको केन्द्रका रूपमा विकास गर्ने उपमहानगरपालिकाको लक्ष्यमा थप सहयोग पुग्ने अपेक्षा गरिएको छ।
