राष्ट्रपति रामचन्द्र पौडेलले सर्वोच्च अदालतमा चार जना नयाँ न्यायाधीश नियुक्त गरेका छन् । न्याय परिषद्को सिफारिस तथा संसदीय सुनुवाइ समितिको अनुमोदनपछि राष्ट्रपति पौडेलले शुक्रबार नेपालको संविधानको धारा १२९ को उपधारा (२) बमोजिम उनीहरूलाई सर्वोच्च अदालतको न्यायाधीश पदमा नियुक्त गरेका हुन् ।
राष्ट्रपतिको कार्यालयका अनुसार सर्वोच्च अदालतको न्यायाधीशमा नियुक्त हुनेहरूमा डा. रत्नबहादुर बागचन्द, चन्द्रबहादुर सारु, जनक पाण्डे र गोकर्ण डाँगी रहेका छन् ।
नियुक्त हुनुअघि डा. बागचन्द उच्च अदालत पोखराका मुख्य न्यायाधीशका रूपमा कार्यरत थिए । त्यसैगरी, सारु उच्च अदालत पाटनका न्यायाधीश, पाण्डे उच्च अदालत पाटनको हेटौँडा इजलासका न्यायाधीश तथा डाँगी उच्च अदालत जनकपुरको अस्थायी इजलास वीरगंजका न्यायाधीश थिए ।
चारै जनाको नाम न्याय परिषद्ले गत असोज २० गते सर्वोच्च अदालतको न्यायाधीश पदमा नियुक्तिका लागि सिफारिस गरेको थियो। त्यसपछि सङ्घीय संसद्को संसदीय सुनुवाइ समितिले कात्तिक १९ गतेदेखि उनीहरूको सुनुवाइ प्रक्रिया अघि बढाएको थियो ।
प्रस्तावित न्यायाधीशहरूविरुद्ध १३ वटा उजुरी परेका थिए। समितिले उजुरी, योग्यता, अनुभव तथा न्यायिक जिम्मेवारी निर्वाह गर्ने क्षमताका विषयमा छलफल र सुनुवाइ गरेपछि कात्तिक २१ गते चारै जनाको नाम सर्वसम्मतिले अनुमोदन गरेको थियो ।
संसदीय सुनुवाइ समितिबाट नाम अनुमोदन भएपछि संवैधानिक प्रक्रियाअनुसार राष्ट्रपतिबाट नियुक्ति गरिएको हो ।
अब नवनियुक्त चारै जना न्यायाधीशलाई प्रधानन्यायाधीश मनोजकुमार शर्माले पद तथा गोपनीयताको शपथ गराउनेछन्। त्यसपछि उनीहरूलाई सर्वोच्च अदालतमा मुद्दाको पेसी तोकिनेछ । नवनियुक्त न्यायाधीशहरूले आगामी सोमबारदेखि नियमित रूपमा काम सुरु गर्ने कार्यक्रम रहेको छ।
चार जना नयाँ न्यायाधीश नियुक्त भएसँगै सर्वोच्च अदालतको न्यायिक कार्यसम्पादनमा थप जनशक्ति उपलब्ध हुने भएको छ । उनीहरूको नियुक्तिसँगै सर्वोच्च अदालतमा विचाराधीन मुद्दाको सुनुवाइ तथा न्याय सम्पादन प्रक्रियालाई थप प्रभावकारी बनाउने अपेक्षा गरिएको छ ।
