मलेसिया सरकारसँग भएको सम्झौताविपरीत गैरकानुनी रूपमा रकम संकलन गरी ठगी गरेको आरोपमा प्रहरीले दुई पूर्वमन्त्रीसहित ६ जनालाई पक्राउ गरेको छ ।
केन्द्रीय अनुसन्धान ब्युरो (सिआइबी) ले बुधबार तत्कालीन श्रम, रोजगार तथा सामाजिक सुरक्षामन्त्रीद्वय शेरबहादुर कुँवर र रामेश्वर राय यादवसहित ६ जनालाई पक्राउ गरेको हो । सिआइबीका एसएसपी अनुपमशमशेर जबराले उनीहरू पक्राउ परेको जानकारी दिनुभयो ।
पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्री शेरबहादुर कुँवर र रामेश्वर राय यादव रहेका छन् । ६० वर्षीय कुँवर अछामको चौरपाटी गाउँपालिका–४ का बासिन्दा हुन् भने ६१ वर्षीय यादव सर्लाहीको चक्रघट्टा गाउँपालिका–बेल्हीका निवासी हुन् ।
त्यस्तै, सोही मन्त्रालयका तत्कालीन सचिव विनोद केसी, तत्कालीन रोजगार व्यवस्थापन महाशाखा प्रमुख एवं सहसचिव उमेश ढुंगाना, राजीव पोखरेल र तत्कालीन कानुन अधिकृत एवं उपसचिव निर्मला गुरुङ पनि पक्राउ परेका छन् ।
प्रधानमन्त्री तथा मन्त्रिपरिषद्को कार्यालयले उनीहरूविरुद्ध जाहेरी दिएपछि सिआइबीले अनुसन्धान अघि बढाएको हो । प्रहरीले उनीहरूमाथि ठगीसम्बन्धी कसुर तथा संगठित अपराध निवारण ऐन, २०७० अन्तर्गत अनुसन्धान गरिरहेको छ । यसका लागि अदालतबाट म्याद थप गरी अनुसन्धान अघि बढाइएको सिआइबीले जनाएको छ ।
सिआइबीका अनुसार नेपाल र मलेसिया सरकारबीच भएको सम्झौताविपरीत गैरकानुनी रूपमा रकम संकलन गरी ठगी गरिएको प्रारम्भिक अनुसन्धानबाट देखिएको छ ।
संकलित रकममध्ये ८३ लाख ७० हजार ४३९ दशमलव ९२ अमेरिकी डलर र ३७ लाख १७ हजार ९८० दशमलव ८० बेलायती पाउन्ड गरी कुल एक अर्ब ६९ करोड दुई लाख २४ हजार २६ रुपैयाँ ७६ पैसा बराबरको रकम सम्झौताको दायराभन्दा बाहिर गई बदनियतपूर्वक विदेशी मुद्रा अपचलन गरिएको आरोप छ ।
अनुसन्धानका क्रममा उनीहरूले मुलुकको अर्थतन्त्रमा प्रतिकूल असर पर्ने तथा विदेशी मुद्रा सञ्चितिमा नोक्सानी पुग्ने गरी निर्णय गरेको र त्यसबाट संगठित समूहले लाभ लिएको आरोपसमेत लागेको छ ।
यस प्रकरणमा पक्राउ परेका पूर्वमन्त्री, तत्कालीन सचिव तथा अन्य कर्मचारीमाथि थप अनुसन्धान भइरहेको सिआइबीले जनाएको छ ।