नेपाल डेमोक्रेटिक लयर्स एसोसिएसन (डीएलए) को ३७ औँ स्थापना दिवसका अवसरमा शनिबार राजविराजमा आयोजित कार्यक्रममा तीन जना वरिष्ठ अधिवक्तालाई सम्मान गरिएको छ ।
डीएलए सप्तरीले आयोजना गरेको अन्तर्क्रिया कार्यक्रममा वरिष्ठ अधिवक्ता हिम्मत सिंह, अमरबहादुर पाण्डे र राजविराज उच्च अदालत बार एसोसिएसनका निवर्तमान अध्यक्ष हरेराम यादवलाई दोसल्ला र गम्छा ओढाएर सम्मान गरिएको हो ।
डीएलए सप्तरीका अध्यक्ष सुरेन्द्रप्रसाद यादवको अध्यक्षतामा आयोजित कार्यक्रममा वरिष्ठ अधिवक्ता हिम्मत सिंहले लोकतन्त्रको रक्षाका साथै जनतालाई न्याय दिलाउन डीएलएले अग्रणी भूमिका निर्वाह गर्दै आएको बताउनुभयो । लोकतान्त्रिक मूल्य, मान्यता र विधिको शासनको संरक्षणमा कानुन व्यवसायीको भूमिका महत्त्वपूर्ण रहेको उहाँले बताउनुभयो ।
यसअघि स्थापना दिवसकै अवसरमा शनिबार बिहान डीएलए सप्तरीले प्रभातफेरीसमेत आयोजना गरेको थियो । राजविराज उच्च अदालत बार एसोसिएसनको भवनअगाडिबाट निकालिएको प्रभातफेरी नगरका विभिन्न भागको परिक्रमा गरी पुनः सोही स्थानमा पुगेर समापन भएको थियो ।
कार्यक्रममा वरिष्ठ अधिवक्ताहरू कृष्णानन्द देव, बोधकृष्ण भगत, नारायण झा, रामजी साह, डा।देवनारायण यादव, इन्द्रदेव सिंह, उच्च बारका पूर्वअध्यक्ष भरत यादव, हरेराम यादव, उपाध्यक्ष धर्मेन्द्र यादव तथा अधिवक्ताहरू प्रल्हाद घिमिरे, शिवनारायण यादव, राजेन्द्रप्रसाद देव, सुभाष यादव, विनोद पाण्डे र सुधा देव लगायतका कानुन व्यवसायीले डीएलएले लोकतन्त्र स्थापना र रक्षाका लागि खेल्दै आएको भूमिकाबारे चर्चा गर्नुभएको थियो । डीएलए सप्तरीका सचिव सुधा देवले कार्यक्रम सञ्चालन तथा स्थापना दिवसका गतिविधिबारे जानकारी दिनुभएको थियो ।