बारा | नेपाल प्रहरीका सातै प्रदेशका राजमार्ग सुरक्षा तथा ट्राफिक व्यवस्थापन कार्यालय र काठमाडौं उपत्यका ट्राफिक प्रहरी कार्यालय गरी आठवटा कार्यालयमध्ये मधेश प्रदेशको बारास्थित पथलैया कार्यालय कार्यसम्पादन मूल्याङ्कनमा पहिलो स्थान हासिल गर्न सफल भएको छ ।
काठमाडौं उपत्यका ट्राफिक प्रहरी कार्यालय तथा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयहरूको २०८३ साल कात्तिक महिनाको कार्यसम्पादन मूल्याङ्कनमा पथलैया कार्यालय पहिलो भएको हो । उक्त उपलब्धिसँगै कार्यालय ‘क’ श्रेणीमा समेत पर्न सफल भएको छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय मधेश प्रदेश, पथलैयाका प्रहरी उपरीक्षक ज्ञानेन्द्रबहादुर बस्नेतको नेतृत्वमा कार्यालयले यो सफलता हासिल गरेको हो ।
कार्यसम्पादन मूल्याङ्कनको नतिजाअनुसार अत्तरिया कार्यालय दोस्रो र काठमाडौं उपत्यका ट्राफिक प्रहरी कार्यालय, रामशाहपथ तेस्रो स्थानमा रहेका छन्। त्यसैगरी बुटवल, सुर्खेत, इटहरी, रामनगर र बेलचौतारा कार्यालय क्रमशः पछिल्ला स्थानमा रहेका छन् ।
पथलैया कार्यालयले पछिल्ला तीन महिनामा आफ्नो कार्यसम्पादनमा निरन्तर सुधार गर्दै आएको छ । भदौ महिनामा छैटौँ स्थानमा रहेको कार्यालय असोजमा तेस्रो स्थानमा उक्लिएको थियो । कात्तिक महिनामा भने अन्य सातवटै कार्यालयलाई पछि पार्दै पहिलो स्थान हासिल गर्न सफल भएको हो ।
तीन महिनाको अवधिमा छैटौँ स्थानबाट तेस्रो हुँदै पहिलो स्थानमा पुग्नुले कार्यालयको कार्यसम्पादन, व्यवस्थापन तथा सेवा प्रवाहमा भएको सुधारलाई देखाएको छ ।
यसैगरी, कार्यसम्पादन मूल्याङ्कनमा जिल्ला ट्राफिक प्रहरी कार्यालय बाराले समेत पाँचौँ स्थान हासिल गरेको छ ।