सिमरा। जीतपुरसिमरा उपमहानगरपालिका-७ का वडाध्यक्ष सुनील गुप्तालाई सात दिन हिरासतमा राखेर अनुसन्धान गर्न जिल्ला अदालत बाराले अनुमति दिएको छ ।
चैत्र १ गते होलीको राति जीतपुरसिमरा-७ मा रहेको परशुराम गिरीको घरमा जबरजस्ती प्रवेश गरी कुटपिट तथा गालीगलौज गरेको आरोप गुप्तामाथि लागेको छ । राति ९ः३० बजे गुप्तासहितको समूहले गिरीको घरमा प्रवेश गरी केही व्यक्तिलाई कुटपिट गरेको सिसिटिभी फुटेज सार्वजनिक भएपछि घटना थप चासोको विषय बनेको हो। सो क्रममा घरधनी परशुराम गिरीले हवाई फायर गरेपछि घटनाले उग्र रूप लिएको थियो ।
हवाई फायर र आक्रमणको दाबी
गिरीले आफ्ना छोरा तथा नातिमाथि वडाध्यक्ष गुप्तासहितको समूहले ज्यान मार्ने उद्देश्यले आक्रमण गरेकाले बाध्य भएर हवाई फायर गर्नुपरेको बताएका छन् । लाइसेन्सप्राप्त बन्दुक घरमै राखेका गिरीले परिवारको सुरक्षाका लागि गोली चलाउनु परेको दाबी गरेका छन् । घटनापछि जिल्ला प्रशासन कार्यालयले दुबै पक्षलाई राखेर मेलमिलाप गराउने प्रयास गरे पनि सहमति हुन नसकेपछि आइतबार बारा प्रहरीले वडाध्यक्ष गुप्तालाई नियन्त्रणमा लिएको थियो ।
सांसदको हस्तक्षेप र थप अनुसन्धान
बारा क्षेत्र नम्बर ४ का सांसद तथा पूर्वमन्त्री कृष्णकुमार श्रेष्ठले सोमबार संसदमा यो विषय उठाएपछि बारा प्रहरी थप दबाबमा परेको छ । प्रहरीले घटनामा संलग्न थप १० जनालाई पक्राउ गर्न बारा जिल्ला अदालतबाट अनुमति लिएको छ । यद्यपि, उनीहरूको नाम गोप्य राखिएको छ।
दोश्रो पटक आपराधिक उपद्रव मुद्दा
वडाध्यक्ष गुप्ता आपराधिक उपद्रव मुद्दामा पक्राउ परेको यो दोस्रो पटक हो । अघिल्लो वर्ष जीतपुरका राजुराज गिरीको घरमा डोजर लिएर प्रवेश गरेको आरोपमा गुप्तामाथि आपराधिक उपद्रवको मुद्दा लागेको थियो । बारा जिल्ला अदालतबाट दोषी ठहर भएका गुप्ताको मुद्दा उच्च अदालतमा विचाराधीन रहँदै गर्दा फेरि उस्तै प्रकृतिको अर्को घटनामा उनी पक्राउ परेका हुन् । जिल्ला प्रहरी कार्यालय बाराका प्रहरी उपरीक्षक सन्तोष तामाङका अनुसार बारा जिल्ला अदालतबाट सात दिनको म्याद लिएर वडाध्यक्ष गुप्तालाई हिरासतमा राखिएको छ । आइतबार पक्राउ परेका गुप्तालाई सोमबार प्रहरीले बारा जिल्ला अदालतमा पेश गरेको थियो ।
