सरकारले पूर्वराजा ज्ञानेन्द्र शाहको राहदानी रद्द गर्ने प्रक्रिया अघि बढाएको छ ।
सरकारी स्रोतका अनुसार शाहले विदेश भाग्न सक्ने आशंका गर्दै उनको राहदानी रद्द गर्न आवश्यक प्रक्रिया सुरु भइसकेको छ । पूर्वराजा शाहमाथि राजसंस्थाको पुनःस्थापनाको मागसहित सडक आन्दोलनमा सक्रिय भूमिका खेलेको आरोप लगाइएको छ ।
हालै देशका विभिन्न ठाउँमा भएको हिंसात्मक आन्दोलनको निर्देशन पूर्वराजाले नै दिएको आशंका सरकारले गरेको छ । हिजोको आन्दोलनका क्रममा भएको आगजनी, तोडफोड र हिंसात्मक गतिविधिमा शाहकै निर्देशनमा तोकिएका जनकमाण्डर र संयोजकहरू सक्रिय रहेको सरकारी पक्षले दाबी गरेको छ ।
पूर्वराजामाथि हिंसात्मक आन्दोलनलाई प्रोत्साहन गरेको आरोपमा छानबिन प्रक्रिया अघि बढ्ने तयारी छ ।
सरकारका एक उच्च अधिकारीका अनुसार, छानबिनबाट बच्न शाह देश छोड्नसक्ने सम्भावनालाई ध्यानमा राख्दै राहदानी रद्द गर्ने निर्णय भएको हो । सुरक्षा निकायका अनुसार पूर्वराजाको गतिविधि नियालिँदै आएको र उनलाई छानबिनमा सहभागी गराएर कानूनी कारबाही अघि बढाउनका लागि आवश्यक कदम चालिने बताइएको छ ।
सरकारको निर्णयको कारण विवाद
पूर्वराजा शाहका समर्थकहरूले भने यो निर्णयलाई राजनीतिक पूर्वाग्रहबाट प्रभावित भन्दै विरोध जनाएका छन् । उनीहरूले पूर्वराजालाई लक्षित गर्दै सरकारले जानाजान षड्यन्त्र रचेको आरोप लगाएका छन् । यसअघि पनि शाहले राजसंस्थाको पुनःस्थापनाका लागि सक्रिय भूमिका खेल्दै आइरहेको र उनका समर्थकहरूले समय-समयमा आन्दोलन गर्दै राजतन्त्रको पक्षमा प्रदर्शन गर्दै आएका थिए ।
तर, पछिल्लो हिंसात्मक गतिविधिपछि सरकारले पूर्वराजालाई कानूनी दायरामा ल्याउने तयारी गरेको हो ।
