पूर्व सांसद हरिनारायण रौनियारले वीरगंज–पथलैया सडक विस्तारको कार्यमा अनावश्यक राजनीतिक हस्तक्षेप नहुने गरी विकासलाई प्राथमिकता दिन सबैलाई आग्रह गरेका छन् ।
सर्वोच्च अदालतले त्रिभुवन राजपथ विस्तारको बाटो खोलिदिएपछि केही दलले त्यसको विरोध गर्दै राजनीतिक लाभ लिन खोजेको भन्दै उनले चिन्ता व्यक्त गरेका हुन् ।
वीरगंज सिटीसँग कुराकानी गर्दै रौनियारले भने, “चितवन, कोहलपुर, बुटवल, नेपालगञ्ज, विराटनगर, जनकपुरजस्ता शहरमा सडक विस्तार भएर सुन्दर र व्यवस्थित बनेका छन् । तर वीरगंजजस्तो आर्थिक र जनघनत्वयुक्त सहरमा अझै पनि बाटो खुम्च्याएर राख्नु विकास विरोधी काम हो ।”
उनले सर्वोच्च अदालतको निर्णयको सम्मान गर्दै वीरगंज–पथलैया सडकलाई दुवै तर्फ २५/२५ मिटर फराकिलो बनाउन सबै सरोकारवालालाई आह्वान गरे । “यो केवल सडक विस्तार होइन, यो सहरको भविष्यको ढोका हो । अब पनि सडक खुम्च्याउने वा निर्णय विपरीत बोल्ने कार्य विकासमा बाधक बन्न सक्छ,” रौनियारले भने ।
उनका अनुसार यो विषयमा सर्वदलीय बैठक, स्थानीय नागरिक समाज, व्यवसायी, नगरवासी र महानगरपालिकाले समेत एउटै स्वरमा फराकिलो सडकको माग गरिरहेको स्पष्ट छ ।
रौनियारले थपे, “वीरगंज देशको महत्वपूर्ण सीमा नाकासँग जोडिएको व्यापारिक केन्द्र हो । यहाँको सडक सञ्जाल फराकिलो र स्तरीय बनाउनु केवल आवश्यकता नभई राष्ट्रिय प्राथमिकताको विषय हो ।” उनले सडक विस्तारको क्रममा प्रभावित हुने नागरिकको उचित मुआब्जा, पुनर्स्थापना र समाधानको उपाय खोज्दै अघि बढ्न सकिने बताए ।
यसअघि सर्वोच्च अदालतले वीरगंज–पथलैया सडकखण्डको चौडाइ २५/२५ मिटर कायम राख्न आदेश दिएको थियो । तर, केही स्थानीय नेता तथा समूहहरूले त्यो निर्णयको विपक्षमा राेटि सेक्ने काम गरिरहेकाे बताए ।
पूर्व सांसद रौनियारले यस्तो कदमले सहरको दिगो विकास र पूर्वाधार निर्माणमा बाधा पुग्ने भन्दै सबै दल र नेताहरूलाई जिम्मेवार बन्न आग्रह गरेका हुन् ।
