राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो तीनदिने भारत भ्रमण नितान्त व्यक्तिगत तथा धार्मिक प्रयोजनका लागि रहेको स्पष्ट पारेका छन्। उनले आफ्नो भ्रमणलाई राजनीतिक विषयसँग जोडेर अनावश्यक बहस नगर्न आग्रह गरेका छन् ।
पत्नी निकिता लामिछानेसहित भारत भ्रमणमा निस्किएका लामिछाने शुक्रबार बिहान काठमाडौंँबाट हवाईमार्ग हुँदै धनगढी पुगेका थिए। धनगढी विमानस्थलबाट कञ्चनपुर हुँदै सडकमार्गबाट गड्डाचौकी नाका पुगेका उनी त्यहाँबाट भारततर्फ प्रस्थान गरेका हुन् ।
भ्रमणका क्रममा कुनै राजनीतिक भेटघाटको कार्यक्रम नरहेको उल्लेख गर्दै लामिछानेले व्यक्तिगत विषय र राजनीतिक विषयलाई अलग राख्नुपर्ने बताएका छन् ।
“कुनै राजनीतिक भेटघाट छैन। कसैलाई खिचडी नपकाउन पनि अनुरोध गर्न चाहन्छु। यो मेरो असाध्यै व्यक्तिगत भ्रमण हो। कहिलेकाहीँ व्यक्तिगत कुरा र राजनीतिक कुरालाई अलग्याउन सक्नुपर्छ,” उनले भने ।
लामिछानेका अनुसार उनी कारागारमा रहँदा उत्तराखण्डको नैनीतालस्थित कैँची धाम जाने भाकल गरेका थिए। सोही भाकल पूरा गर्न परिवारसहित भारत जान लागेको उनले बताएका छन् ।
“म कारागारमा हुँदा नै एउटा भाकल गरेको थिएँ। धार्मिक आस्था, विश्वास र पारिवारिक संस्कारका कारण पनि पहिलेदेखि नै जाने योजना थियो। त्यही भाकल पूरा गर्न जान लागेको हुँ,” उनले भने ।
भारत भ्रमणका क्रममा लामिछाने परिवारले उत्तराखण्डको नैनीतालस्थित कैँची धाम र आसामको गुवाहाटीस्थित कामाख्या मन्दिर पुगेर पूजाआजा गर्ने कार्यक्रम रहेको छ ।
