पर्सा, पोखरिया २०८२ जेष्ठ १२ गते,
पर्साको इलाका प्रहरी कार्यालय, पोखरियाले मोटरसाइकल चोरीमा संलग्न रहेको आरो पमा तीन जनालाई पक्राउ गरेको छ । प्रहरीले शनिबार पोखरिया नगरपालिका–४ का रितिक गिरीलाई ना.५४प ३८७७ नम्बरको मोटरसाइकल चोरी गरी मात्र १२ हजार रुपैयाँमा बिक्री गरेको अभियोगमा नियन्त्रणमा लिएको हो ।
रितिकको बयानका आधारमा सोही वडाका कृष्ण महतो नुनिया र रामविश्वास महरा पनि पक्राउ परेका छन्। उनीहरूलाई वडा नं ९, शिवर्वाबाट पक्राउ गरिएको प्रहरीले जनाएको छ ।
प्रहरी अनुसन्धानका क्रममा मोटरसाइकल बिन्ध्यावासिनी गाउँपालिका क्षेत्रमै १२ हजार रुपैयाँमा बिक्री गरिएको खुलेको छ। प्रहरीले बताएको अनुसार, पक्राउ परेकाहरू लामो समयदेखि मोटरसाइकल चोरी गर्दै आए पनि सवारीधनीहरूले उजूरी नदिँदा उनीहरू प्रहरीको नजरबाट उम्किएका थिए ।
“उनीहरूले मोटरसाइकल चोरी गरेपछि सवारीधनीलाई फिर्ता गरिदिन्थे, जसले गर्दा धेरैले उजूरी नै नगर्ने गरेका थिए,” प्रहरीले जनाएको छ । तर यसपटक पीडितले औपचारिक उजूरी दिएपछि अनुसन्धान सुरु गरिएको हो ।
प्रहरीले तीनै जनामाथि एक दर्जनभन्दा बढी मोटरसाइकल चोरीमा संलग्न रहेको आशंका गर्दै थप अनुसन्धान जारी रहेको जनाएको छ। अन्य चोरीका घटनामा समेत उनीहरूको संलग्नता पुष्टि हुने अपेक्षा गरिएको छ ।
