वीरगंजस्थित कैलाश होटलमा भएको गुण्डागर्दी तथा कुटपिट प्रकरणमा पर्सा प्रहरीको भुमिका माथि प्रश्न उठेको पिडितले आरोप लगाएको छ ।
घटनामा संलग्न रहेको आरोप लागेका सबै व्यक्तिलाई पक्राउ गर्न नसकेको र कुटपिटसम्बन्धी आरोपमा जाहेरी दर्ता गरी अनुसन्धान अघि बढाउनुको सट्टा एक जनालाई मात्र पक्राउ गरी अभद्र व्यवहारसम्बन्धी कसुरमा अनुसन्धान गरिरहेको भन्दै प्रहरीको कार्यशैलीमाथि पिडितले नै प्रश्न उठाएको हो ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लका अनुसार घटनामा एक जनालाई पक्राउ गरी अभद्र व्यवहार सम्बन्धी कसुरमा सात दिनको म्याद थप गरेर अनुसन्धान भइरहेको छ । घटनासम्बन्धी प्राप्त प्रमाणका आधारमा मुद्दा अघि बढाइएको र थप प्रमाण प्राप्त भएमा कसुर परिवर्तन गर्न सकिने उनले दाबी गरेका छन् ।
यता कुटपिटबाट पीडित भएको दाबी गर्ने अंकित जालानले भने घटनालाई अपहरण, कुटपिट तथा लुटपाटसँग सम्बन्धित कसुरका रूपमा अनुसन्धान गर्न माग गरेका छन् । उनले दीपक तिवारीसहित पाँच जनाविरुद्ध पर्सा प्रहरी र जिल्ला सरकारी वकिल कार्यालयमा हुलाकमार्फत जाहेरी दिएर दर्ता गराउनु परेको बताए ।
उनका अनुसार प्रहरी समक्ष जाहेरी दिन खोज्दा नलिएकाला हुलाकमार्फत अपहरण तथा शरीर बन्धकसम्बन्धी कसुरमा जाहेरी दिएको बताएका छन् ।
जालानका अनुसार गत कात्तिक ६ गते राति करिब ९ बजे कैलाश होटलको रेस्टुरेन्टमा खाजा खाइरहेका बेला सन्दीप तुल्सियान, दीपक तिवारी, धिरज अग्रवाल, सिताराम सिंह र राकेश राज लगायतका व्यक्तिले आफूलाई घेरा हालेर नियन्त्रणमा लिएका थिए । त्यसपछि गालीगलौज गर्दै हात, लात र मुक्काले कुटपिट गरेको उनको आरोप छ ।
उनले आफूलाई होटलबाट मोटरसाइकलमा राखेर विभिन्न स्थान हुँदै जगरनाथपुर पु¥याइएको र त्यहाँसमेत कुटपिट गरिएको दाबी गरेका छन् ।
घटनाको भिडियो सार्वजनिक भइसकेको अवस्थामा समेत आरोपित सबै व्यक्ति पक्राउ नपर्नु र पीडितले दाबी गरेको कसुरभन्दा फरक कसुरमा अनुसन्धान अघि बढाउनुले प्रहरीको अनुसन्धान प्रक्रियाबारे प्रश्न उठाएको छ ।
